Дальша перспектива

автор дюра латяк
6.8k Опатрене

Драмски мемориял Петра Ризнича Дядї жиє уж полни пейдзешат роки. Тот його животни вик потвердзел же його снователє потрафели виталну потребу нашей малочисленей националней заєднїци у датим чаше. Кельо зме надалєй годни спатрац каждорочни досцигнуца на нїм, найвецей завиши од материялних, просторних и кадрових условийох у яких ше тота дїялносц одвива. Кельо будземе способни ускладзиц их зоз нашима потребами и можлївосцами – укаже час.

Снованє Драмского меморияла Петра Ризнича Дядї потвердзело  же за таке  подняце исновали и одвитуюци дружтвени и политични условия, а окреме финансийна потримовка тедишнїх державних власцох. Бо, Керестур 1969. року вецей нє бул окремна општина и нє мог зоз свойого буджету финансовац таку манифестацию, гоч и мал за ню потребне порозуменє. Постал состойна часц Општини Кула, а там буджетни средства наменєни за културу нє могли покриц потреби Кули як шедзиска Општини и седем месних заєднїцох, гоч и там було порозуменя за потреби Руского Керестура як културного центра Руснацох у тедишнєй Югославиї. Значи, главнїна финансийней потримовки завишела од покраїнских орґанох власци. Так то и почало.

Бул то и час кед ше наша новинско-видавательна  хижа  „Руске слово” преселєла з Руского Керестура до Нового Саду. Прилапена є там як институция ровноправней националней меншини, котра там жила по теди уж блїзко сто роки. А познате же иницияторе снованя Меморияла и Аматерского руского театра „Дядя” були заняти у тей нашей видавательней хижи. Им ше удало прибилїжиц нє лєм ґу городским, алє и ґу покраїнским орґаном власци и достац од нїх потримовку у реализациї спомнутей инициятиви. Медзитим, як ше на власци меняли рижни политични партиї, так ше меняла и їх потримовка розвою нашей култури, а у рамикох того, и театралней дїялносци.

ПРЕМЕНКИ НА ОРҐАНИЗАЦИЙНИМ ПЛАНЄ

После политичних пременкох у нашей жеми указала ше потреба за дзепоєднима пременками и у нашим културним живоце, у першим шоре на орґанизацийним планє. Так од 2001. року конституовани Совит фестивалох як окремна институция, у чиєй компетенциї орґанизованє штирох наших културних манифестацийох: „Червеней ружи”, „Костельниковей єшенї”, „Коцурскей жатви”  и  Драмского меморияла Петра Ризнича Дядї, з тим же ту буду мац место и даєдни други нашо манифестациї кед здобуду характер покраїнского значеня. Єст причини наздавац ше же тоти пременки буду мац позитивни вплїв на дальши розвой наших културних манифестрацийох, та у рамикох того и нашей драмскей дїялносци.

Кед слово о потреби иснованя такей театралней манифестациї, вец  мож повесц же вона нє вшадзи єднак похопена, окреме у нєшкайшим чаше кед ше векшина наших людзох примушена старац за обезпечованє средствох за елементарну фамелийну еґзистенцию. Познате нам же у таких условийох култура и национална свидомосц поциснута на побочну драгу. Потвердзує то и прейдзени период у иснованю Драмского меморияла Петра Ризнича Дядї. Спочатку вон мал широку потримовку нє лєм державних власцох, алє и значного числа спонзорох, особлїво приватних поднїмательох. Медзитим, як час преходзел и як ше дружтвено-политични обставини почали компликовац, так почало опадовац и число приватних спонзорох. Прето ше їх орґанизаторе знаходзели як могли и знали, лєм же би нє преривали їх континуитет. За тото зме им длужни дац  заслужене припознанє.

Най авторови тих шорикох, як єдному спомедзи иницияторох снованя тей нашей театралней манифестациї, будзе допущене констатовац же и нашо културни дїяче, окреме просвитни роботнїки, остатнєй децениї були примушени векшу увагу пошвецовац обезпечованю материялних условийох за свою елементарну еґзистенцию, а меншу увагу култури и звонкашколским активносцом. Прето и маме таки осцилациї у пририхтованю театралних представох за дзеци. А треба вериц же шицким познате же виповедзене слово зоз сцени ма найменєй два позитивни ефекти: допомага пестованю култури бешеди актерох на сцени и збогацує бешеду слухачох. Праве прето нам театрални представи, попри иншим, и нєзаменлїви у пестованю рускей бешеди, окреме у местох дзе ше вона остатнїх рокох почала обачлїво занєдзбовац, та аж и трациц.

ЄСТ ПРИЧИНИ ЗА ОПТИМИЗЕМ

Судзаци по остатнїх информацийох, яки мож дознац зоз наших политично-информативних медийох, у поглядзе дальшей перспективи нашого Драмского меморияла и розвою нашого театралного живота, єст  причини за єдну дозу оптимизма. Материялна база нашого дружтва з каждим роком вше богатша и мож очековац и векши видвойованя за културни потреби дружтва як цалосци, та у склопе того и за културни потреби рускей националней меншини у Републики Сербиї. А, же  бизме  нє заостали у розвою за другима националнима заєднїцами у нашей Автономней Покраїни Войводини, мушиме ше успишнєйше прилагодзовац часу у котрим жиєме.

Нєт сумнїву же у першим шоре будзе потребне прецизнєйше утвердзиц статус Руского народного театра „Петро Ризнич Дядя”, бо од того вельо завиши и статус Меморияла як  „єдинственей традицийней манифестациї и стретнуца квалитетного драмского аматеризма, а источасно и фестивала  досцигнуцох драмских секцийох наших културно-просвитних дружтвох и аматерских театрох”. Тиж так, будзе потребне утвердзиц же кельо Мемориял и убудуце ма буц место дзе буду наступац кулянски општински театрални  дружтва як госци (цо, без сумнїву, представя лєм интерес Руского Керестура), а кельо на нїм можу участвовац професийни ансамбли зоз жеми и иножемства. Потребне будзе и векше анґажованє Националного совиту Руснацох на даваню помоци нашим културно-уметнїцким дружтвом и театралним ґрупом на визначованю їх статуса у рамикох стредкох у котрих дїйствую, бо им така помоц нєобходна у першим шоре пре їх процентуално малу численосц у тих стредкох, а даґдзе и пре нєодвитуюцу кадрову структуру.

Нєзаменлїву улогу у дальшим розвою театралного аматеризма маю и нашо просвитни роботнїки, котри перши поволани розвивац любов ґу театру одмалючка при школских дзецох. Правда, вони то и робя, алє нє ридко без координациї зоз руководителями театралних ґрупох у рамикох наших културно-уметнїцких дружтвох. Прето ше случує же театрални секциї при КУД-ох нє маю свой подросток и нє можу обезпечиц континуитет у своєй театралней аматерскей дїялносци. Нєшка зме шведкове же ше подаєдни театрални ґрупи на Мемориялу нє зявели и по даскельо роки, а то и знак же нє змогли позберац  достаточне число аматерох. А кед ше и зявели, вец то було зоз даєдну моно драму, або зоз театралним фалатом з малим числом актерох.

ТЕАТЕР НЄ ГОДЗЕН БЕЗ МЛАДИХ

Нє шме ше призабуц же значни вплїв на розвой нашей театралней дїялносци ма и креиранє одвитуюцого репертоара. Нєшка воно зведзене на поєдинсцох, найчастейше самих режисерох, котри себе сами виберу театрални фалат, преложа го на наш язик, виберу бавячох и поставяю го на сцену. Дакеди то и добре, алє – нє и вше! Скорей им у тим помагала наша видавательна хижа, обявююци театрални фалати у прекладу на наш язик, або ориґинални твори наших авторох. Була то добре обдумана репертоарна политика, котра ше значно операла на реални можлївосци наших театралних аматерох. Нажаль, нєшка и наша видавательна хижа нє дїйствує у таких условийох як скорей, алє як єден зоз факторох  креированя репертоарней политики вшелїяк же може дац свой значни прилог. Тиж так, и Завод за културу войводянских Руснацох, у рамикох своєй порядней дїялносци, може вельо помогнуц коло орґанизованя сходох на котрих би ше могло викристализовац заєднїцки цилї у креированю репертоарней политики и медзисобней помоци у єй реализованю.

Окреме будзе значне же би ше до театралней дїялносци по наших местох уключовали млади, бо вони найлєпша ґаранция же будзе обезпечени єй континуитет през длугши период.

Дальша перспектива нашей аматерскей театралней дїялносци, та и самого Драмского меморияла як места на котрим ше спатраю каждорочни досцигнуца у нєй, найвецей завиши од материялних, просторних и кадрових условийох у яких ше тота дїялносц одвива. Кельо будземе способни ускладзиц их зоз нашима потребами и  можлївосцами – укаже час.

На концу того нашого препатрунку пейдзешатрочного периода у иснованю нашого Драмского меморияла Петра Ризнича Дядї, место заключеня, послужиме ше зоз цитатом, винятим зоз статї Дюри Папгаргая, обявеней у Народним календаре за 1990. рок (боки 111-112) под Насловом „Дядя – наш театрални защитни знак”, з нагоди сторочнїци од народзеня того нашого театралного дїяча и педаґоґа, котри глаши:

„Дядя пошол, алє памятки на ньго при нас живо присутни. Аматерски руски театер, яки основани 1970. року, з окремну пиху ноши назву свойого учителя и уж роками найширшей югославянскей явносци, та и за гранїцами нашей жеми, з Дядьовим меном, презентує високи досяги руских аматерох, Дядьових школярох як цо, наприклад,  Мрожеково „Полицає”, Нушичова „Ожалосцена фамилия”, Михичова „Жовта”, Папгаргайова „Вистата конїца”, Брехтова „Жобрацка опера”, „Автобус” Стратиєва, „У едену на востоку” Борислава Пекича… То лєм даскелї приклади вельких успихох з Дядьовим меном. У нїх зоз своїма школярами жиє и їх учитель. Жиє вон и у смотри  руских драмских колективох, у аматерским стретнуцу под назву Мемориял Петра Ризнича Дядї, котре ше уж по традициї отримує у Руским Керестуре од 1969. року. Так сцена рускокерестурского Дома култури тирваци шведок єднорочней драмскей жатви заренкох котри зашал наш паметлїви учитель. И Театер и Мемориял хасновити приклад як свойо власне треба пестовац и чувац од забуца. А то жадали и його школяре и його колеґове и жителє местох дзе Дядя робел.”

ПОТРАЦЕНИ ЕНТУЗИЯЗЕМ

Олена Планчак-Сакачова ма право кед у Руским християнским календаре за 2009. рок (бок 36) констатує же Мемориял и 2008.  року „потвердзел же при Руснацох скапал драмски аматеризем по наших местох, а прецо, у наиходзацим чаше будзе требац направиц глїбши анализи.” Ми би то прецизнєйше поведли же скапал ентузиязем у драмским аматеризме по наших местох, алє глїбши анализи потребни нє лєм прето же би ше нашло одвит на поставене питанє, алє найбаржей прето же би ше пренашло найреалнєйшу драгу за обнавянє потраценого ентузиязма у дальшим пестованю театралного аматеризма як нєзаменлївого сеґмента у  пестованю нашого националного идентитета.

(Конєц)

ПОВЯЗАНИ ТЕКСТИ