НОВИ САД – Пондзелок, 22. септембра у своїм 79. року живота умар Михайло Биндас, пензионовани радийски и телевизийски новинар.
Михайло Биндас ше народзел 5. децембра 1946. року у Руским Керестуре. Перши пейц класи Основней школи закончел у Руским Керестуре, а Основну школу и Ґимназию у Новим Садзе. Абсолвовал Югославянску литературу на Филозофским факултету, тиж у Новим Садзе. Позарядово закончел студиї журналистики у Заґребе, як стипендиста Радио Нового Саду.
У Рускей редакциї Радио Нового Саду почал робиц 1968. року, хонорарно, на омладинских емисийох, а под час студийох ушорйовал боки студентского часописа Индекс. Од 1974. року бул урядово заняти у РНС, а до пензиї пошол кед наполнєл 65 роки, 2011. року.
Робел на емисийох репортажного характеру, бул заменїк и помоцнїк главного и одвичательного редактора програми на руским язику Радио Нового Саду, редактор емисийох Културна панорама и Аґенция, подїя, надїя, ушорйовал шицки емисиї хтори теди исновали на програми на руским язику Радио Нового Саду, редактор информативних емисийох и окончовал шицки други новинарски задатки и роботи. Сотрудзовал и зоз редакциями других националних заєднїцох Радио Нового Саду.
Достал награду Светозар Маркович за телевизийски документарни филм – репортажу зоз тему Роботнїцки рух у Вербаскей општини медзи двома войнами, а до пензиї пошол зоз рочну радийску награду РТВ.
Хованє Михайла Биндаса будзе на стреду, 24. септембра на 14 годзин у Руским Керестуре. Сочувство фамелиї годно виявиц у керестурскей каплїчки од 12 годзин.