З мойого кута

автор юлиян пап
6.7k Опатрене

ХРОБАК: Єдней яри преорани даскельо тисячи гектари цукровей цвикли, бо ю нападнул хробак.

Кед би то бул єдини хробак хтори подгриза польопривреду…

 

МАЖА: Землєдїлци треба же би активно участвовали у креїрованю аґрарней политики.

Бо, цала аґрарна политика спрам селянох креїрує ше найчастейше на мажи, при одкупе и виплацованю польопривредних продуктох.

 

ГИБРИД: У шлєбодним тарґовищу польопривредним продуковательом ище вше нє ясне цо ше им виплаци шац.

Даєдни гваря же би найлєпше було крижац кукурицу, жито, цвиклу, слунечнїк, сою и ище даєдну рошлїну, та би з такого гибриду озда лєм дацо випадло…

 

ШЕНО: Пред коло 20 роками, на списку увозних артиклох було жито, кукурица, месо, млєко, масло, масц, та ше нашло аж и – шено.

Хронїчаре того часу призначели: „Тераз на шоре плєва, терека, копачи, вигризки… А вивожиц можеме лєм празну сламу. Тоту цо ю политичаре трепу у дискусийох о перспективох дальшого розвою польопривреди и поживовей индустриї”.

Анї нєшка ше ту нє бог-зна цо пременєло.

 

МЕТЛА: Гваря же ше у нас прави тельо метли, кельо маме и жительох. Значи, каждому по єдна метла, аж их маме и за вивоз.

Нє згорше би було послац по єдну метлу и до даєдних наших званийох…

 

ҐАРАНЦИЯ: Дакеди ше за польопривредни продукти приношело такволани ґарантовани цени. Потим держава утвердзовала такволани защитни цени.

Продукователє гваря же лєпши були гевти прешли часи, бо им з терашнїма ценами на шлєбодним тарґовищу заґарантовани лєм – утрати.

 

СУД: Було раз и таке же ше слунечнїк пре якиш нєпорозуменя нашол на суду. Алє док потамаль сцигол, постал запражка и макух, та ше о нїм страцели шицки докази…

ПОВЯЗАНИ ТЕКСТИ