Тих дньох тирва упис предшколских дзецох до першей класи основней школи. Рихтаю ше вони за тото и у дзецинскей заградки, а дзепоєдни ище додатно, як и шейсцрочни Андрей Гарди з Руского Керестура. Вон ходзи до школи менталней аритметики у Кули хтора ше вола „Brain o brain” (Брейн о брeйн).
Андрей ше уписал там кед мал пейц роки а, як гвари його мама, случайно видзели обяву на интернету, та ше заинтересовали цо понука тота школа.
– Перша годзина ми була барз интересантна. Учели зме раховац на абакусу. То древена раховалька и робели зме креативни роботнї. Барз ше ми пачело же сом з часом научел рахованє на першим уровню, до дзевец Барз ми помогло же сом ше там и по сербски научел бешедовац, а упознал сом и вельо товаришох – виприповедал нам Андрей.
Як дознаваме, за тераз уж положел два уровнї и достал два сертификати за котри мушел ришовац предвидзени тести. Тераз є уписани и на треци уровень и там почал учиц двоцифрово числа.
– Тот уровень дакус чежши як прешли два, алє зоз вежбаньом дома идзе лєгчейше. У ученю ми барз помага мама. Вона ми толкує задатки хтори ми чежше иду – виволал нам наш собешеднїк.
Же му тота „наука” добре идзе потвердзело ище єдно припознанє. У януару того року Андрей участвовал и на змаганю подобних школох, тє. їх школяре, а змаганє було прейґ интернету.
– Пририхтовали зме ше зоз учительку длугши час, вежбали зме и у школи, а и дома сом вежбал кажди дзень. На тим змаганю сом бул други и достал сом стриберну медалю и сертификат же сом там участвовал. Уж ше рихтаме и за нове змаганє хторе будзе у маю у Беоґрадзе – дознаваме од Андрея.
Понеже циль школи „Брeйн о брейн” же би дзеци розвили ментални капацитети, схопносц и одвичательносц и так ше пририхтали и за цо лєпши успих у порядней школи, сподзиваме ше же то поможе и Андрейови котри на єшень шеда до лавкох першей класи у керестурскей Школи „Петро Кузмяк”.