Зменьовали ше оптимизем и песимизем

автор дюра латяк
6.1k Опатрене

До штвартей децениї отримованя нашей театралней смотри, пошвеценей нашому Дядьови, вошло ше  з осцилуюцима резултатами. Було таки роки кед ше поцерпало же ше нам тота єдина театрална смотра годна загашиц, а вец и таки котри улївали надїю же криза будзе звладана.

Ище у половки трецей децениї Меморияла Гавриїл Колєсар у Руским календаре за 1994. рок (б. 42-43), коментаруюци 25. Драмски мемориял Петра Ризнича Дядї, висловел нагадованє:

„Ювилейни ХХV Драмски мемориял „Петра Ризнича” отримани од 18. до 24. априла у Руским Керестуре. Тота традицийна драмска смотра Руснацох Югославиї, праве пре ювилей, пририхтована з вецей ентузиязма як скорей, алє, нажаль, шива стварносц зменшала закладаня орґанизаторох и очекованя публики. Програмни змист бул по квантитету и по квалитету скромнєйши и дзекуюци лєм упартосци аматерох и особох котри творя єдну представу, швето театралних витвореньох на руским язику отримане, нє знїкла манифестация „театра и уметносци котра нас, як културни здобуток, децениями отримала”. Остало лєм питанє чи то, тераз, на прагу гевти библийни „седем (або и вецей) гладни роки”, голєм кед слово о театралней дїялносци на руским язику.”

НЄ ОКЛЯПЛА ДЗЕКА АМАТЕРОХ И ЕНТУЗИЯСТОХ

А вец, поставело ше питанє чи ше ХХХІ Мемориял вообще и отрима. Здогаднєме ше же то бул 1999. рок, кед нашу жем праве концом марца почали бомбардовац жеми члени НАТО пакта. Зруйновали нам мости, телевизийни обєкти, велї будинки орґанох власци.., погинуло и значне число цивилних особох, жени и дзеци. Теди ше на Мемориял нє могло анї думац. На щесце, у юнию истого року бомбардованє престало и живот ше помали почал нормализовац. Главнїна скромних буджетних средствох була унапрямена на обнову, та за културу мало оставало.

Та, заш лєм, моцна дзека наших аматерох и орґанизаторох Меморияла нє окляпла. Уж о даскельо мешаци по бомбардованю окончени пририхтованя за отримованє ХХХІ Драмского меморияла Петра Ризнича Дядї! Правда, скромного по обсягу и змисту, алє – вон отримани. Виведзени шицкого 8 представи – по руски 3 за старших и 2 за дзеци, и 3 госцуюци, по сербски.

ХХХІІ Драмски мемориял принєс значну дозу оптимизма у поглядзе його дальшей перспективи. У Руским календаре за 2002. рок призначене же „Двацетого априла почал 32. Драмски мемориял Петра Ризнича Дядї. Отворели го Славко Орос, директор керестурского Дома култури и познати драмски уметнїки Светлана Бойкович и Петар Краль. По 28. април, покля тирвал Мемориял, представени досяги драмских аматерох шицких наших местох. Виведзени 8 представи за одроснутих, а найлєпша представа була „Бависка на заднїм дворе”.

Випатрало нам же будзе знова пошвецена достойна увага власцох нашим намаганьом же бизме и прейґ сценского слова зачували свой язик и културни здобутки. Дзека указана, алє обєктивни обставини були тоти котри одлучовали о финансийней потримовки таким  нашим намаганьом.

Тото найлєпше илуструє коментар Олени Планчак-Сакач у Руским календаре за 2003. рок (бок 44) котри глаши:

„Тогорочни 34. драмски мемориял Петра Ризнича Дядї, хтори отримани у Руским Керестуре од 19. по 27. април, по своїм обсягу и квалитету нє досцигнул лоньски. После длугшого часу Мемориял ознова мал змагательни характер, цо му давало праву фестивалску атмосферу, бо ше каждого вечара додзельовало награду за найлєпше ґлумецке витворенє, а на самим концу вибрана найлєпша женска, хлопска и дебитантска улога, як и найлєпша представа Меморияла. Заш лєм, упечаток таки же того року було чежко виберац найлєпшу представу и же було мало представи у змагательней часци.

(… нєпотребне вихабел Дю. Л.) Мемориялу хибели друженя после представох, хибел єден простор дзе би ше позберали шицки и дзе би ше могло повинчовац и побешедовац зоз учашнїками. Хибели и округли столи, гоч вони нєформално „жили”, бо ше у Червеней сали Дома култури о представох и упечаткох кажди вечар бешедовало.”

ПРИЛАПЕНА ИНИЦИЯТИВА ЗА ПРОФЕСИОНАЛИЗАЦИЮ ТЕАТРА

Дакус вецей оптимизма принєсли подїї у нашим театралним живоце, котри предходзели 35-ому Драмскому мемориялу. Видно то зоз коментара Олени Планчак-Сакач, обявеного у Християнским руским календаре за 2004. рок (б. 63-67), чию часц ту цитуєме:

„Вивершна рада АП Войводини потримала длугорочне жаданє аматерских театрох националних меншинох при Руснацох, Словацох и Румунох, хтори були у функциї професийних, же би початком 2003. року преросли до професийних, понеже исновали условия за їх снованє. Тота потримовка виражена на схадзки Вивершней ради АП Войводини 5. фебруара 2003. року, на хторей одлучене же ше зоз покраїнского буджета обезпеча средства за анґажованє уметнїкох по проєктох у тих театрох, и то за два премиєри и 20 репризи рочнє.

Прилапйованє инициятиви за професионализацию театрох при Руснацох, Словацох и Румунох историйна подїя, а Покраїнски секретарият за образованє и културу обезпечел за кажди театер по  милион динари, а ище по 2 милиони динари обезпечене зоз средствох буджетских резервох.

Руски народни театер „Дядя” у маю 2003. року пререґистровани и нєшка ноши нову назву Руски народни театер „Петро Ризнич Дядя” зоз шедзиском у Руским Керестуре. Штредком октобра, точнєйше 18. всоботу вечар у Руским Керестуре отворена перша професийна сезона при Руснацох зоз премиєру „Важне буц озбильни” ирского писателя Оскара Вайлда, а у режиї Владимир Надя Ачима.”

На вельки жаль, тот оптимизем нє потирвал длуго, бо О.П.С. на истим месце призначела же на Мемориялу  участвовали  РНТ „Дядя”, Сцена Руски Керестур, як и Сцена Нови Сад, КУД „Тарас Шевченко” зоз Дюрдьова и Дружтво Руснацох зоз Суботици. Представи за одроснутих нє порихтали Коцурци и Вербащанє, та пре мале число представох нє була преглашена найлєпша представа.

ЧОМ КАПЕ АМАТЕРИЗЕМ?

Коментаруюци 37. Мемориял, О.П.С. ше запитала: „Цо ше нєшка случує зоз театралну уметносцу при Руснацох, чом капе аматеризем по наших местох, чежко повесц. Правда же театрална уметносц єдна з найдрагших, а у нас пенєж у култури вше хибел, алє тиж так театер нєшка уж прежил осучасньованє и вельки трансформациї.”

ХХХІХ Драмски мемориял прицагнул увагу и державних власцох. Виведзени дзевец представи, осем за одроснутих и два дзецински, а

ювилейни, 40.  Драмски мемориял, О.П.С. у Руским християнским календаре за 2009. рок (на бокох 36-37) так прекоментаровала:

„Штерацети, ювилейни, Драмски мемориял „Петра Ризнича Дядї”, прешол скромно, без велькей помпи, без припознаньох заслужним дїячом у театралней дїялносци, без премиєри, без министра… По чишлє виведзених представох, було их седемнац, поведло би ше же є богати, алє сам вибор гутори цошка цалком процивне. Векшина представох виведзена репризно, а Мемориял и того року потвердзел же при Руснацох скапал драмски аматеризем по наших местох, а прецо, у наиходзацим чаше будзе требац направиц глїбши анализи.”

Кризни период у добрей мири заходзи и до начатей пиятей децениї иснованя нашого театралного швета. И у тим периодзе замерковани значни осцилациї. Їх з добрей часци можеме и розумиц, бо зме малочислена национална заєднїца и на єй културни розвиток значни вплїв ма кажда єй єдинка. А праве у тей децениї зме страцели нашого найзначнєйшого театралного дїяча после Петра Ризнича Дядї – Дюру Папгаргая, котри бул єден з иницияторох и сновательох Меморияла и його найчастейши учаснїк як режисер и єден з найугляднєйших орґанизаторох. Страцели зме и найглавнєйших ґлумцох РНТ „Дядя” Янка Павловича, Миколу Скубана, Витомира Бодянца, Силвестера Ґачу, Юлина Стрибера, Юлияна Рамача Чама, Агафию Рамачову, а нєдавно и Михайла Зазуляка…  и других. Шицки нас вони напущели нєсподзивано, нєочековано… На їх место, на щесце, пришли нови талантовани кадри, алє и їм потребне досц часу же би досцигли таки уметнїцки уровень яки мали їх предходнїки.

У наяви 44. Драмского меморияла Петра Ризнича Дядї у „Руским слове” од 13. априла 2012. року (бок 9) Михайло Зазуляк пише же на репертоаре буду 13 представи, алє и констатує:

„Но, нєт представи з Дюрдьова и Шиду, а Коцурци и Вербщанє, одкаль паметаме добри и богати ансамбли, представи за старших и за дзеци, на Мемориялу участвую з дуо драмами. То нїяк нє за подценьованє, алє лєм доказ же нашим дружтвом хиби даяка „коктел театрална инекция”, алє и пенєжна, тота хтора би дакус порушала потребни театрални ентузиязем.”

НЇЧ ШЕ НЄ ПОМКЛО

Нє лєпша ситуация анї у 2017. року, котри предходзи полвичному ювилею того нашого найвекшого театралного швета. На тим, 49. по шоре, Драмским мемориялу Петра Ризнича Дядї виведзени шицкого 8 театрални представи. Од того по руски 3 за старших и 2 за дзеци, єдна за дзеци по українски, а госци ше представели по сербски и „по виходнярски”. То лєм знак же криза ище вше нє превладана.

Подпис: Републични министер за културу Бранислав Лечич уручел награди за найлєпши представи на 32. Драмским мемориялє Петра Ризнича Дядї

(Предлужи ше)

ПОВЯЗАНИ ТЕКСТИ