Японска уметносц зогинаня паперу и правеня рижних предметох постої барз длуго. Радован Бодвански зоз Вербасу барз люби ориґами и препровадзує вельо часу у правеню рижних животиньох. Прето, кед єдного дня пришол на годзину руского язика, предложел наставнїци Славици Мали ориґиналну идею.
Школяр пиятей класи у Основней школи „20. октобер” у Вербаше уж досц звладал технїку зогинаня паперу, та му тераз лєгко идзе. Но, кед почал, нє було му лєгко. Бул ище у другей класи кед почал правиц тоти фиґурки же би мал цо предац и так себе заробиц даєден динарчок. И – удало ше му. З часом постал схопни у тим, та тераз тото цо справи випатра барз фино.
– За шицко цо сцеце направиц маце шему. Так сом направел лабуда, журавля, качку, чамец, гуску, делфина, диносауруса, птичку и рака. То сом направел зоз билого паперу, а квитки зоз червених паперох – задовольно указує свойо дїла.
Радован и иншак барз креативни, зоз подобового гвари же ма вше шицки петици, а тераз го барз интересує макетарство. Почал правиц миниятурни макети просторийох, у хторих шицко стої на своїм месце.
Порядно ходзи и на годзини руского язика ґу наставнїци Славици Мали, та ришел же єй предложи интересантни способ ученя нових словох.
– Пришол сом раз на годзину и принєсол шицко цо сом направел у ориґами технїки. Положел сом на стол и предложел же бизме за кажди предмет учели як ше вола по руски. Вона прилапела, а моїм товаришом ше то барз пачело, бо зме перше правели тоти предмети, а потим учели як ше их вигваря – здогадує ше Радован.
Иншаки способ правеня квиткох, бо ше папер муши штригац и лїпкац. Гвари же то дакус компликованше, бо треба мерковац як ше штрига и лїпка, алє резултат барз красни.
Тот интересантни хлапец гвари же нєодлуга почнє тренирац джудо, гоч потераз тренирал фодбал. Люби бавиц зоз товаришами фодбал, а дакеди и зоз псами, бо вони стално грижу його белаву фодбалску лабду.
Рисованє му барз идзе, цо видно по рисункох хтори його наставнїца посила до дзецинского часопису Заградка.