Татиана Варґа народзена 1983. року у Новим Садзе. Основну и штредню Економску школу „Светозар Милетич” закончела у Новим Садзе. Потим ше уписала на Економски факултет у Суботици на котрим дипломовала 2007. року, а по краткей павзи, 2012. року, закончела и мастер студиї на тим истим факултету.
Кед була у штреднєй школи и на факултету, у шлєбодним чаше ридко кеди мальовала, гоч уметносц вше була єй состойна часц живота – закончела основну музичну школу „Йосип Славенски” у Новим Садзе (напрям клавир), а роками була и активни член у новосадских културно-уметнїцких дружтвох ‒ у руским РКЦ-у вецей як 15 роки шпивала у дзивоцкей ґрупи, а у словацким дружтве „Павел Йозеф Шафарик” танцовала у фолклору скоро 20 роки.
Кед була мала барз любела кед баба Юстина Сакач, хтора була шивачка, шила шматки барбиком, та вец и вона правела рижни креациї зоз платнових фалаткох. Оцова мац, мамичка Зузана Чинчурак, роками вишивала на машини словацки народни облєчива, заглавки и посцелїну дзивком цо були за одай. Сама рисовала мустри котри вец вишивала, а знала барз крашнє и мальовац. Татиану учели шиц, вишивац на крижики, а мацерова андя Мария Сакачова научела ю штрикац и писац писанки з воском. Шицки тоти єй „учительки” розвивали таланти хтори кучали у нєй.
Кед уж мала сина Андрея з нїм рисовала, правела маґнети зоз глїни, винчованки бабом и дїдом, пайташом за родзени днї.
На Фейсбуку єй з єдней нагоди вискочела реклама, же у єдним новосадским ателєу буду тримац роботнї за родителя и дзецко, та ше приявела. У ателєу мальовали портрети зоз акрилнима фарбами. Тота технїка єй була блїзка, понеже вше любела мальовац зоз темперами. И так, цалком случайно, того лєта одкрила мальованє, яке вше и задумовала. Намальовала затераз лєм штири портрети дзивкох, и даскельо пейзажи у акрилней технїки.
