НОВИ САД – У велїх местох у Сербиї вчера на меил адреси до основних и стреднїх школох сцигли дояви о бомбох.
Министерство просвити сообщело же як сцигли дояви о бомбох у 807 основних и стреднїх школох у Сербиї екипи МУП препатрели часц школох и утвердзели же дояви були фалшиви, и же ше школярох потим врацало до школох.
Покраїнска влада сообшела же з нагоди явяньох о поставених бомбох хтори сцигли на имейл адреси дзепоєдних основних и стреднїх школох у Войводини и ширцом Сербиї, шицки компетентни институциї такой реаґовали и подняли мири у складзе зоз протоколами безпечносци.
У сообщеню пише и же покраїнски секретарият за образованє, предписаня, управу и национални меншини – национални заєднїци у нєпреривним контакту зоз компетентнима орґанами. Приоритет безпечносц школярох, наставнїкох и занятих.
Кажде пробованє загрожованя безпечносци дзецох, уношеня панїки и нарушованя образовно-воспитного процесу заслужує найоштрейше осудзованє. Глїбоко бриґує спознанє о тим же исную поєдинци хтори на таки способ нарушую роботу наших образовних установох, наведзене у сообщеню Покраїнскей влади.