РУСКИ КЕРЕСТУР – Нєшка рано вирни зоз Руского Керестура рушаю на паломнїцтво до грекокатолїцких святилїщох у Восточней Словацкей.
Паломнїцтво орґанизує Епархия святого Миколая Руски Керестур и будзе тирвац од штвартку, 25. септембра по нєдзелю, 29. септембра.
Руша ше рано штварток, 25. септембра и перше место пребуваня Лютина, после зявеньох св. Миколая 1851. року кед ше тот святитель указал Зузани Фекетовей подаровал Марийову икону – Лютина постала найвекше грекокатолїцке паломнїцке место у Словацкей.
Други дзень, пияток, 26. септембра ше одходзи до Литмановей – на гори Звир у Литмановей ше од 5. августа 1990. до 6. августа 1995. року Пресвята Мария указала двом дзивчатом – Иветки Корчаковей и Катки Чеселковей, у єдним хлїве, а при ньому Мария поблагословела студню при хторей ше до нєшка случую чуда и виздравеня.
Пополадню паломнїки нащивя Твердиню у Старей Любовнї, древену грекокатолїцку церкву, сканзен – руски музей на отвореним.
Всоботу, 27. септембра рано ше одходзи до Красного Броду – Василиянски манастир у Крсним Броду найстарши у прешовскей грекокатолїцкей епархиї. Манастир ма длугоку историю, ище у 14. вику у нїм виздравел цемни жобрак. Од теди тот манастир ма вельке значенє за Василиянох, ту була школа, ту пошвецани свяшенїки. Опатри ше Чертижне и Габуру – русинску хижу, древену церкву. Памятнїк князови Лаборца.
Внєдзелю, 28. септембра Литурґия будзе у Гуменим, одкаль ше пополадню идзе дому.
Кажди дзень буду Служби Божо у местох хтори ше будзе нащивйовац, будзе ше спац у Лютини и у Медзилаборцох. У цени раховане спанє, єдзенє, автобус, уходнїци на твердиню, до сканзенох.