У биоґрафиї Ванеси Гарди пише же є народзена у Вербаше 1971. року, у Югославиї, Войводини, мац и оцец Керестурци, вона з Маковского шора, у дзецинстве пошла жиц до Ковачици, дзе єй мац Еуфемия Гудак Гарди робела у школи. Почала мальовац так же имитирала мацеров фиґуративни стил, а єдного дня почала мальовац линиї, абстрактни форми. На 14 роки ше уписала до беоґрадскей Уметнїцкей школи, на 19 роки на Академию подобових уметносцох у Братислави. Од 1990. по 1996. рок студирала на Академиї подобових уметносцох у Братислави, а од 1994. по 1999. паралелно и на Академиї подобових уметносцох у Бечу.
Року 2000. є преглашена за Младого уметнїка у Словацкей, достала награду Центра визуелнох уметносцох „Златне око” у Новим Садзе, награду Министерства науки за дипломску роботу у Бечу, и велї други престижни награди. Мала заєднїцки и самостойни вистави по цалей Европи, у Америки. Поряднє участвує на Биєналу уметносцох у Венециї дзе и у тей хвильки ма виставу.
Ище на братиславскей Академиї уметносцох почала експериментовац зоз своїма першима монохромами, хторим є вирна. Ванеса Гарди нє вибера свойо фарби, вона их жиє, препущує ше им, кед малює ту є, з другого боку димензиї, наноши даскельо пасма розличних фарбох з лопатку, глєда праву фарбу, хтора ше у єдней хвильки зявює. Порушує ю преношенє енерґиї на платно, метал, плексиґлас, древо, зоз нагромадзованьом пасмох, драпаньом и дробеньом. Єй живот зведзени на праву фарбу. Бляди фарби на єй найновших малюнкох намальованих на квадратох и правоугельнїкох без рамох, лєм на рубцох нагадую грубину пасмох хтори свидомо положела, прецизно одредзує комбинациї хтори фарбом одредза диялоґ у просторе. Кед на мур виша малюнки стара ше же би мали баланс и же би ше обезпечело енерґию хтора циркулує медзи малюнками и простором. То интуитивносц процесу. Зоз фамелию нєшка жиє у варошу Анси у Французкей.
