РУСКИ КЕРЕСТУР – Нєсподзивано, у 51. року живота, умар Йожеф Йоле Бодо, заменїк командира Добродзечного огньогасного дружтва Руски Керестур.
Бодо народзени 11. юлия 1975. року у Србобрану, одкаль ше преселєл до Кули, а потим зоз фамелию и до Руского Керестура, дзе жил дацо менєй як 20 роки. У валалє ше анґажовал як огньогашец од 2019. року, кед го тутейша заєднїца и почала упознавац як наисце гуманого чловека.
Бул пошвецени огньогашец, робел на тим же би прицагнул младих и дзеци до Огньогасного дому, єден є зоз заслужних за набавку опреми огньогасцом.
Попри тим, у тим року ше визначел як чловек велького шерца кед порушал гуманитарну акцию за Планчакових на салашу у Кули, после седем мешацох упартих акцийох помоци Планчаковим, збераня средствох, лєм дзень скорей шмерци, Бодо обвисцел явносц же акция закончена, же обезпечени средства за контейнер за биванє котри истого дня однєсли и намесцели.
Умар нєсподзивано, док вєдно зоз колеґами ишли на терен помогнуц гашиц огень до Лалитю.
Йожеф Йоле Бодо будзе поховани нєшка, 25. октобра, на 15 г. на Католїцким теметове у Кули, а за нїм остала супруга и двойо дзеци.