РУСКИ КЕРЕСТУР – Пияток, 24. октобра, подприємство ДОО Либела Продукт зоз Змаєва пущела до погону нови силоси.
Подприємство ДОО Либела Продукт у Руским Керестуре успишно функционує уж штири роки, и так пошли и крочай далєй та направели свойо нови силоси же би людзом було лєгчейше придавац свойо продукти.
Култури хтори актуални и буду актуални у нових силосох то: жито, слунечнїк, кукурица и соя, а тиж и вше векше число кооперантох ше одволує каждого року хтори задовольни зоз сотруднїцтвом.
Подприємство Либела Продукт тиж понука и штучни гной, дзе кооперанти зоз Руского Керестура и околїска можу присц до набавки.
Єден з власнїкох, Момчило Прелевич подзековал шицким подприємством хтори допринєсли вибудови силосох у кратким часу и гварел же ше идуцого року планує преширйованє, та док ше шицко закончи, аж вец годно повесц же то буду силоси. Тераз закончена лєм перша фаза роботох, а то претоварна станїца зоз хторей ше роба транспортує далєй до векших силосох до Коцура або Змаєва.
На отвераню нових силосох подприємства ДОО Либела Продукт присуствовали кооперанти, людзе зоз хторима сотрудзую и блїзки приятелє.
