Звук подковох хтори ритмично одгукую под коньми у бегцу, напарти глас спикера и погляди патрачох, возбудзенє хторе рошнє кед ше конї приблїжую ґу цилю – шицко тото крашело ище єдни дринґацки обегованя, хтори того викенду отримани у Руским Керестуре
На Гиподроме Леї, внєдзелю, 22. юния, зишли ше вецей як 500 патраче, любителє коньох, спорту, алє и традициї котра длуга вецей як два децениї, з оглядом на тото же перши дринґацки обегованя коньох у Керестуре отримани давного 1998. року.
На нєдзельовим змаганю ше у шейсцох точкох, на 1.800 метери, обеговали коло 60 конї, чийо власнїки були з рижних местох зоз Войводини и Сербиї. Опрез каждей точки отримани дефиле запрагох, а главни того пополадня бул вирни приятель Конїцкого клубу „Русин”, Зоран Опачич зоз Червинки, хтори приходзи на рижни манифестациї потримац наш клуб. Зоз свою запрагу пред публику першираз предефиловал и Керестурец Драґан Николич.
МЕНЄЙ ПРЕДСТАВНЇКИ З КЕРЕСТУРА
Того року Керестур нє мал своїх наградзованих коньох, а нє мал анї вельо представнїкох, як цо то було прешлих рокох.
Єдини представнїки були кобула Equidia, чийо власниїки Борис и Ивана Медєши, хтора бежала у 4. партиї, алє була виключена, а у 2. партиї участвовала и кобула Konstrakta Star, власнїка Драґана Николича зоз Керестура. Свойого коня за обегованє рихтал и Иґор Надь, но, нажаль, лєм тидзень пред змаганьом кобула покалїчела ногу.
У 5. точки под назву „21. мемориял Яр ‘89” бежал конь Марко хтори завжал 3. место, а хтори бул донєдавна у власнїцтве Керестурца Иґора Папуґового. Папуґа тераз власнїк младого, дворочного коня хтори ище нє квалификовани. Його конь може участвовац перше на ґенерацийних обегованьох, а нарок, накадзи наполнї три роки, годзен бежац у гоч хторей партиї.
ОКРЕМНИ АКЦЕНТ НА ТОЧКУ „XXI МЕМОРИЯЛ ЯР ʼ’89.”
Спомнута 5. точка „XXI Мемориял „Яр ʼ89.” ношела назву пошвецену штверим школяром з Руского Керестура хтори вяри, ʼ89. року, настрадали у транспортним нєщесцу у Лалитю кед путовали до школи до Оджаку. Пре тоту траґичну подїю, єдна партия на дринґацких обегованьох уж полни 21 рок ноши тоту назву як здогадованє на тоти дзеци цо погинули, та Конїцки клуб „Русин” дава окремни акцент праве на ню.
На тот завод, фамелия Будински з Керестура, чий син бул, нажаль, єден зоз школярох хтори настрадали тей смутней яри ʼ89. року, вифинансовала, а потим и уручела, найвекши погар вожачови и почесни покровец за побиднїцкого коня. З тей нагоди то бул конь Валтер чий власнїк зоз Суботици, а вожел го Йосип Иловац.
НАГРАДИ НАЙЛЄПШИМ
У першим обегованю участвовали конї зоз найменєй освоєнима бодами, а у остатнїм, шестим, уж искуснєйши конї, односно, тоти хтори у своєй кариєри витворели векши успихи.
Резултатска таблїчка на концу дринґацкого змаганя випатрала так – у першим обегованю, под назву „Ремеселнїки, привреднїки и польопривреднїки”, участвовали 12 конї, а найшвидше по циль сцигол конь Alians, власнїка Милутина Трусника зоз Вршцу, хторого вожел Саша Ґруїч.
У другим обегованю, под назву „Месна заєднїца Руски Керестур”, участвовали тиж 12 конї хтори приблїжно єднак стартовали, медзитим, на концу побиду однєсли Андор Вереб и його конь Acula, чийо власнїки Марко и Тихомир Црнкович зоз Таванкуту. Други на циль сцигнул конь Ivan R.V. чий вожач бул Роберт Секе, а потим и конь Elastina зоз Миланом Тасичом, котрому власнїк Радослав Чирин зоз Дюрдьова.
У трецей ґрупи под меном „Конїцки клуб Русин” ше обеговали 12 конї, а замерковану побиду однєсол Никола Симович зоз коньом Izida P, у власнїцтве Николи Пауновича зоз Краґуєвцу. Други на циль сцигли Мирко Орачич и його Ernisazs Hol, а за нїма такой и Paloma и його вожач Желько Радойкович.
У шлїдуюцим, штвартим, змаганю под назву „Општина Кула” ше обеговали 5 конї, а найшвидше на циль сцигнул конь Concordia, чий власнїк Владан Воїнович зоз Чачку.
Пияте змаганє, котре мало назву „21. Mемориял Яр ʼ89.” було резервоване за дзевец конї. Озбильна конкуренция добре тримала увагу публики, а побиднїцки погар однєсол Йосип Иловац зоз коньом Valterom, чий власнїк зоз Суботици, други бул конь Atena и його вожач Атила Секе, а такой за нїмa сцигли и Борис Нович зоз коньом Markom, хторому, як уж спомнуте, бувши власнїк бул Керестурец Иґор Папуґа.
Дринґацки обегованя закончени зоз шесту точку, под меном „Dream Catcher d.o.o. Sombor”, а слово о подприємству хторому власнїк оцец єдного з найлєпших кошаркашох швета, Николи Йокича, а хторе и финансийно потримало тоту партию. Медзи седем конями хтори ше у тей точки обеговали, фаворит бул уж добре познати вожач Борис Кеченович зоз коньом No fear of ʼem, власнїка Миодраґа Заґорца зоз Суботици, а такой после нього, на циль сцигол и Зоран Петрович зоз коньом Ren, док треце место у тей ґрупи завжал конь Čarli Star и його вожач Деян Катанич.
По законченю обегованя, у каждей од шейсцох точкох найлєпшим змагательом були додзелєни погари, за перши штири места у каждей обеговацкей точки ше достало пенєжни награди, а наградни фонд бул 80.000 динари.
– Барз зме задовольни як шицко прешло, и зоз тим кельо конї ше приявело за змаганє и кельо було нащивительох. Верим же нєшка вєдно зоз учашнїками було коло 1000 людзох на нашим гиподроме. Кажди член орґанизациї одробел свою роботу так як треба, та можем повесц же зме з рока на рок вше убавенши – гварел єден з главних орґанизаторох и предсидатель Конїцкого клубу, Желько Папуґа, а окрем нього за тот успишни спортски дзень єднак заслужни и – Иґор Надь, Юлиян Будински, Янко Плачнак, Иґор Папуґа, як и велї други хтори орґанизатором були на помоци.
Окрем обегованя коньох, наймладшим були орґанизовани и рижни интересантни бависка за розвагу, а присутни могли уживац и у рижних смачних єдлох, варених у котлох.
Змаганє финансийно потримали числени спонзоре, подприємства зоз валалу, а главни покровитель и того року Општина Кула.
БЕЗ НЇХ НЄ МОГЛО
У Орґанизацийним одборе змаганя були – Желько Папуґа, Иґор Надь, Юлиян Будински, Янко Планчак, Иґор Папуґа; у руководительстве обегованьох були Юлиян Будински, Желько Папуґа и Янко Планчак. Судийове на змаганю були Драґолюб Филипович, Ясмина Црвени, Иван Медєши и Боян Костич, спикер бул Илич Радоми, падок Драґутин Корпонаич, а сликер бул Деян Иванич.
Члени домашнього огньогасного Дружтва помогли так же зоз своїм камионом полївали дражку пре вельки прах, а помагали им и Славко Колошняї, Иґор Надь и Елемир Надь. За гладканє дражки за бежанє бул задлужени Йоаким Медєши, дежурни коваль бул Янко Планчак, гандикап Иґор Папуґа, Иґор Надь и Желько Папуґа, а ветеринар бул Йово Гайдин, як и екипа Дома здравя з Кули.
