27. МАРЕЦ – Нєшка ше означує Шветови дзень театру.
1793 – Кральовска дворска комора дошлєбодзела Йожефови Кишови же може почац роботи на проєкту Велького Бачкого Каналу. Истого року 6. мая почало ше копац беґель, хтори з вецей почежкосци закончени 1802. року. Познєйше направени системи беґльох до хторих одведзена вода з мочарох и так ше спущели поджемни води, а достало ше вельо плодней жеми у Бачки.
1845 – Народзени нємецки физичар Вилхем Конрад Рендґен (Ленеп, Пруска, 27. марец 1845 – Минхен, Нємецка, 8. новембер 1895) хтори пренашол „икс” зарї – електромаґнетни габи хтори по нїм наволани „рендґеново зарї”, за цо є наградзени зоз Нобелову награду за физику 1901. року. Медзинародна уния чистей и применєней хемиї (IUPAC) наволала елемент 111 – рендґениюм, радиоактивни елемент зоз вецей нєстабилнима изотопами, по Рендгенови наволана и мерна єдинка рендґен.
1867 – Народзени анґлийски инжинєр Фредерик Генри Ройс, хтори зоз Чарлсом Ролсом основал компанию за продукцию автомобилох Ролс-Ройс, чийо автомобили нєпревозидзени по луксузу и квалитету.
1941 – Народзени шпивач забавней музики Миодраґ Мики Євремович (Беоґрад, 27. марец 1941 – Беоґрад, 13. януар 2017). Мики Євремович бул барз популарни шпивач 70. и 80. рокох прешлого вику, а на руским язику одшпивал два шпиванки Полюбели зме ше и Ружи, червени ружи, цо було вельки гит кед ше тота ґрамофонска плоча зявела медзи Руснацами у Войводини.
1983 – Першираз запровадзене лєтнє и жимске рахованє часу у Сербиї.
Нєшка Шветови дзень театру (World theatre day), означує ше инициятиву Медзинародного театралного института од 1961. року.