У Руским Керестуре, дзе ше децениями хаснує виключно традицийни (масивни) вибудов хижох зоз цеглох, блокох и бетону, Янко Мудри одлучел викрочиц и перши у валалє подзвигнуц монтажну контейнер хижу на слупи. Место класичного будованя вибрал сучасне, економичне ришенє хторе шпорує енерґию и простор.
Кед Янко Мудри поровнал високи цени будовательного материялу класичних хижох, и швидку вибудов, єдноставносц и енерґетску ефикасносц монтажних контейнерох за биванє, нє требало му вельо часу превагнуц. Одлучел ше за монтажну контейнер хижу хтору ше дакеди хасновало лєм як дочасове ришенє, а нєшка таки обєкти поставаю озбильна алтернатива за тирваци живот, окреме на валалох.
– Кед сом роздумовал о правеню хижи, сцел сом ю направиц цо швидше, а же би нє була драга. Опатрал сом класични монтажни хижи, алє пре леґализацию и рижну документацию видзело ше ми же то будзе компликованше, та сом ше одлучел за контейнер за биванє. Перше сом опатрал такволани А-фрейм типи монтажних хижох. То хижи зоз зукосим закрицом аж по жем. Були ми интересантни, та сом перше таку хижу сцел направиц сам, медзитим, таки тип хижох нє мож добудовйовац, або преширйовац, а обични контейнери за биванє мож – приповеда Янко Мудри.
Обисце лєгко мож прешириц
Контейнер за биванє, хтори бул составени зоз двох часцох, Янко купел 2022. року. Обидва часци поєдинєчно мали димензиї 8 раз 3 квадратни метери, односно вкупна велькосц його обєкту теди, 2022. року, була 48 квадратни метери. О рок обєкт преширел, додал и трецу часц истих димензийох, та тераз хижа ма 72 квадрати.
– Тоти три часци конструкциї у форми правоугла поставени єдна за другу, так же до длужини бим могол хижу преширйовац кельо сцем. Назадку сом вибудовал ґарадичи, одкадз и уходзим, а бочно бим исто могол преширйовац обєкт, алє нє будзем, бо нє мам места у дворе. Приключок за струю и воду сом мал зоз мацеровей хижи хтора обок, на истей порти, та ми нє требало дозволи. Цали обєкт поставени на 11 слупох, та прето мам и додатну квадратуру, односно простор за ґаражу и роботню хтори попод хижу. Кажда часц контейнеру ма свою повалу, а на повалу зме кладли три пасма изолациї. На панел зме положели склєняну волну, прейґ того панел, а зоднука сом залїпел украсни стиропор – предлужує Мудри.
По його словох, робота швидко ишла. Два часци обєкту направени за 23 днї, а 24. дня рано камион уж сцигол на його адресу.
– Шицко направене у фирми, намонтирани облаки и дзвери, з помоцу дзвигачки и крану конструкция поставена на порту. Но, дас 20 днї пред тим сом вилївал фундаменти котри глїбоки 70 центиметри и пол метери з пол метера. Тераз єст 11 слупи, повязани су медзи собу, та кед би єден попущел, други го будзе тримац. Наприклад, тота хижа би добре могла поднєсц трешенє жеми 10 ступнї Рихтеровей скали. Може ше деформовац, алє би остала цала – прешвечлїви Мудри.
Кед слово о нукашньосци обєкту, у перших двох часцох ма спальню, дньову хижу, кухню и купальню, а у трецей часци ище єдна спальня и велька простория, односно як ю вон вола – „жимска башта”.
– Там сом положел стол и карсцелї, та там пошедаме з пайташами кед робиме по вонку, же бизме таки брудни нє уходзели до хижи. Струя поцагана по мурох през монтажни ярчки. Углавним су позакладани зоз мебльом, та их нє видно, так же естетично шицко крашнє випатра. Циви за воду тиж могло укопац до жеми, алє у мнє вода идзе по вонку, по цегелкох, а преходзи и през ґаражу, та кед же даґдзе пречури, такой видзим и дзе. Шицко барз єдноставне и тунє – наглашує вон.
Єдна часц конструкциї димензиї 8 раз 3 теди, 2022. року, нашого собешеднїка коштала 5.300 евра. Тераз их ма таки три, а до цени було ураховане и монтиранє и превоз.
– Слупи коштали 1.000 евра, а 2.000 евра були капури и плочи зоз хторима сом обложел слупи же бим завар простор за ґаражу попод хижу. Поставянє струї було досц єдноставне, та сом и ту пришпоровал, и можем повесц же ме коло 25 тисячи евра коштало шицко, вєдно зоз мебльом. Но, нє мам дацо луксузне, а ґу тому сом вельо того и сам поробел. Кухню сом сам справел, воду сам положел, мал сом помоц и кед сом кладол цегелки, ламинат сом сам кладол, а и мебель сом правел сам – приповеда наш собешеднїк – езермайстор за шицко, а по фаху столар.
Цеплотна изолация добра, звучна кус слабша
Вонкашнї мури на Янковей хижи груби 5 центиметри, то такволани термоизолацийни сендвич панели, односно два плехи медзи хторима пур пена. Гвари же цеплотна изолация барз добра, а то окреме мож обачиц на концу мешаца кед сцигню рахунки за струю. Звучна изолация, з другого боку, кус слабша, а у таких обєктох треба обезпечиц и добру вентилацию простору.
– Бал сом ше же будзем трошиц вельо струї, бо ше греєм на климу. Хаснуєм дванацку и вона зогреє цалу хижу, даяки 50 квадрати. Кед мур з цегли, перше ше вон муши зограц, та аж вец у просториї цепло, а у моєй хижи цепло такой . Кед сом цали дзень нє дома, вечар придзем и за два минути ми цепло. Рахунки за струю ми барз мали. Влєце струю плацим коло 3,5 до 4 тисячи динари, а вжиме дас 8-9 тисячи. Сцел сом убудовац и соларни панели, алє бим нє вельо зашоровал. Положел сом шицки лед шветла, инсталациї мам нови, нє мам кратки спої, нїґдзе нє розруцуєм енерґию. Влєце сом пробовал загашиц климу, та сом такой обачел же воздух стої, же мури нє дихаю. Даяка файта вентилациї нєобходна у таких обєктох, бо, поведзме, влєце накадзи слунко зашвици, такой цеплєйше, та прето клима муши нєпреривно робиц. Но, звучна изолация дакус слабша, алє плануєм и тото ришиц. Мури обложим зоз камену волну и положим фасаду, та будзе випатрац як стандардна хижа. Людзе, углавним, фасади робя зоз стиропору, а то гришка, на фасаду би требало положиц камену волну – прешвечлїво приповеда Янко о економичносци такого биваня, и наглашує ище єдну предносц таких хижох можлївосц же би ше хижу, вєдно зоз власнїком, преселєло на нову локацийю без класичного, драгого и длугорочного будованя од фундаментох, цо окреме важне нєшка кед ше роботни и животни околносци швидко меняю.
Цо би иншак зробел
Нєшка, после назбераного искуства, гвари же єдине цо би пременєл то же би направел иншаки розпорядок просторийох и кус подзвигнул повалу.
– Там дзе була кухня, була би дньова хижа, бо сом направел барз вельку кухню, та мам вецей простору. Тиж бим повалу ище кус висше дзвигнул. Моя поставена на 2,40 метери, а требал сом ю поставиц за 10 центиметри висше. Думам же би вельо елитнєйше випатрал цали простор. Но, то уж моя гришка. Зоз шицким другим сом барз задовольни – закончує вон.