ШИД – З нагоди националного швета Руснацох, всоботу, 24. януара у Руским доме отримани други Медзинародни шаховски турнир на хторим ше змагали 28 шахисти зоз Шиду, Сримскей Митровици, Индїї, Бачкей Паланки и зоз Заґребу и Вуковару зоз Републики Горватскей.
Бавело ше седем кола у темпу 10 минути по бавячови, а перше место освоєл Петар Колоґнат, фиде майстор зоз Сримскей Митровици зоз 6,5 бодами.
Други бул фиде майстор Зоран Лїкар зоз Вуковару зоз 6 бодами, а треци майсторски кандидат Бранислав Рошка зоз Заґребу, по походзеню зоз Ердевику при Шиду, хтори освоєл пейц боди, а змагала ше и його супруга як єдина шахистка Наташа Рошка.
Найлєпши шахисти наградзени, першепласовани достал погар, медалю и пенєжну часц, а друго и трецепласовани достали медалї и пенєжну часц награди.
Найстарши шахиста на турниру мал 77 роки, а наймладши дзевец роки и шицки ше после змаганя дружели на полудзенку.
Успишни орґанизатор турнира була Шаховска секция Културно-просвитного дружтва „Дюра Киш“ зоз Шиду.
