ШИД – У Спортскей гали всоботу, 14. фебруара отримана традицийна Туристично-привредна манифестация „Шидска колбасияда” на хторeй ше позберали числени викладаче и продукователє нє лєм сухих колбасох алє и других продуктох.
Опрез гали нащивительом указане швидке фаластованє швинї, пражело ше шкварки, а тиж и надзивало швижи колбаси и змагало хто швидше поє пражену колбасу, або випиє криґлу пива.
Колбаси ше предавало за 1.200 динари за килограм, шкварки було од 1.200 по 1.500 динари за килограм, масц 250 динари килограм, а домашнї кулен за 4.500 динари за килограм.
Медзи викладачами була и месарня „Дачо 1929” зоз Коцра, месаре зоз Бачинцох и других местох як и продукователє продуктох з млєка, вина, палєнки, соку, колача и других лакоткох.
Польопривредне ґаздовство „Гнатко” зоз Бикичу виложело природни соки зоз овоци и желєняви, а кушнїр Мирослав Сорочко зоз Беркасова виложел першняки, брушлїки и други продукти зоз природней скори.
На манифестациї було менєй нащивительох як прешлого року алє кажде нашол цо му требало спрам смаку и кишенки.
