КУЛА – Порядна схадзка Скупштини општини Кула отримана вчера, 23. януара на дньовим шоре були даскельо одлуки о предаваню општинского маєтку, та дата согласносц за надополнєнє минусу у каси ЯКП „Пречисцовач Вербас – Кула” Вербас. Надалєй розришени директор ЯКП „Комуналєц” зоз Кули и меновани окончователь длужносци на його место.
Понеже потерашнї директор Комуналцу Марко Пешич задзековал на функцию, на його место тераз поставени о. д. Ненад Влахович котри потераз бул заняти у Општинскей управи на месце руководителя Оддзелєня за дружтвени дїялносци.
Надалєй, на схадзки розришени стари и меновани нови члени Комисиї за плани Општини Кула, и члени Школского одбору ОШ „Иса Баїч” у Кули.
Дньови шор дополнєни зоз предкладом опозицийних одборнїкох за розришенє зоз функциї предсидателя Општини Кула Дамяна Милянича, и зоз предкладом за розришенє предсидателя СО Кула Велибора Милоїчича, з котрих анї єден нє достал векшинску потримовку.
Скорей схадзки, предсидатель СО Милоїчич поинформовал локалних парламентарцох же одборнїк Душан Кулянчич зоз лїстини „Заєднїца Сербох” задзековал на тото место, о чим тиж принєшена одлука. По менованє нового члена зоз истей лїстини, кулски парламент будзе робиц зоз єдним одборнїком менєй.
Схадзка прешла у динамичних розправох медзи одборнїками позициї и опозициї, зоз нєприкладним доруцованьом и докричованьом. Подобна ситуация була и опрез будинку Општини Кула, були присутни полицайци у полней опреми за розбиванє демонстрацийох, як и роботнїки за обезпечованє мира и порядку. На схадзку сцели войсц и даскельо опозицийни посланїки зоз Скупштини АП Войводини, медзитим то ше им нє удало. И попри досц велькей гужви опрез будинку, заш лєм шицко прешло без инцидентох, та полиция нє мушела интервеновац.