Нєшка Нове Орахово ма меней як 1500 жительох и у нїм вєдно жию Мадяре, Руснаци, Серби и други народносци. Число Руснацох ше з роками зменшує, алє гоч их нєшка там єст менєй як 100, вони ше намагаю зачувац свой идентитет. Ораховчанє, после дванац рокох, того року ознова домашнї и на преслави Националного швета Руснацох.
Ґрупа худобних колонистох, 13. мая 1946. року, зоз Руского Керестура рушела до нєпознатого за хлєбом, за лєпшим животом. До валалу на сиверу Бачкей перше пошли 49 фамелиї, а по конєц 1946. року ище скоро 100. З оглядом на тото же було вельо орехи, валал наволани Орахово – по твардим, длуговичним, плодним древе.
Маю свойо културно-уметнїцке дружтво, дзеци у основней школи факултативно уча руски язик, маю церкву, хтору дзеля зоз римокатолїками, а дома чуваю руски обичаї.
Донєдавна у Бачкей Тополї мали и радио и телевизийну емисию на руским язику, хтора загашена после привитазициї.
Кажди рок, з нагоди досельованя Руснацох до Нового Орахова и рочнїци снованя КУД „Петро Кузмяк”, орґанизую манифестацию „13. май” у чиїх рамикох ґрупа бициґлистох символично прейдзе драгу зоз Руского Керестура до Нового Орахова.
Руснацом у Новим Орахове початок нє бул анї кус лєгки и жило ше чежко. Шицко було худобне. Иншаке цалком як нєшка. Тераз вельо динамичнєйши живот и швидше ше жиє. Жительство преважно старши людзе, а младши одходза до векших местох пре школованє и роботу. Єст вельо дзеци зоз мишаних малженствох, котри прави приклад складного соживота вецей националносцох, даєдни знаю бешедовац аж три язики – мадярски, руски и сербски.
КУД „Петро Кузмяк” основане 1947. року, а нєшка у нїм активни лєм оркестер, други секциї вецей нєт. У Дружтве шицки робя волонтерски, а їх дїялносци финансує Национални совит Руснацох, Општина Бачка Тополя, Месна заєднїца, а часц средствох доставаю прейґ конкурсох. Предсидателька Дружтва Татяна Дудаш.
Руснаци у Новим Орахове маю и церкву, вєдно зоз римокатолїками, а служиц им приходзи о. Владислав Рац зоз Коцура. У їх домох ше ище вше почитує руски обичаї, а гудаци з Дружтва уж традицийно ходза по шпиваню по обисцох и шпиваю коляди. Як гваря, дакеди заграю и по драже, а наймилше им кед их людзе дзечнє дочекаю и кед у їх очох видза радосц.
Ораховчанє провадза руски медиї, а окреме ше радую кед сцигню новини „Руске слово”, та их аж и пожичую єдни другим. Найволя их читац кед єст дацо и о Новим Орахове.
У Основних школох „Чаки Лайош” у Бачкей Тополї и „18. октобер” у Новим Орахове дзеци факултативно уча руски язик, и вєдно их єст коло дзешецеро хтори поряднє ходза. Кажди тидзень маю по два школски годзини, хтори им трима Татяна Дудаш. Медзи нїма єст школярох котри ше з часу на час упишу до єдиней Ґимназиї по руски у Руским Керестуре, як и на студиї русинистики на Филозофским факултету у Новим Садзе.
