Стефан Арва з Руского Керестура прави приклад же дзеци и тинейджере нє лєм шедза за компютерами и з мобилнима телефонами у рукох, як ше их нєшка часто представя. Кед є нє у порядней, лєбо музичней школи, або на фолклору, Стефан роби на полю, у загради, стара ше о швиньох и помага оцови у майсторскей роботнї
Тот школяр седмей класи у школи люби физичне, математику и руски язик, а найволї после школи пойсц на польо, як гвари, одпочинуц душу.
– Ходзим на польо одмалючка и робим шицко цо треба. Вшелїяк, понеже ище нє мам вожацку дозволу, нє ходзим сам, алє з оцом, хтори, углавним, зо мну у кабини и хтори ме шицко и научел. И робим скоро шицко – танєруєм, рихтам за шатву, шеєм, орем, розруцуєм штучни гной, балирам… Найволїм кед ше тлачи жито и кед го идземе вожиц, то ми барз интересантне и возбудлїве. Мали зме и паприґу кед сом бул менши, вецей ю нє садзиме, алє ю ходзим з бачиком парац, наводньовац и шицко цо треба. То ми нє проблем и терха, алє одпочивок за душу. И на розпусту нє можем шедзиц дома за компютером, мушим вще дацо робиц, даґдзе бегац – приповеда нам вредни Стефан.
Кед бул лєм пията класа, сцел себе заробиц даяки пенєж, та купел прашата, хтори сам и одховал. Кус познєйше посадзел сладку кукурицу до загради, а през лєто зме го видзели и як на вецей местох у валалє предава тото цо му зродзело.
– Мацеровей пайташки муж з Коцура ми приповедал о сладкей кукурици и то ме зацикавело. Наручел сом нашенє, засадзел сом дома до загради и шицко розпредал. Шицко сом робел сам, оцец ми помагал праве лєм теди кед требало. Влєце сом ю предавал опрез обисца и опрез фирми дзе роби моя мац, як и на Ноцним турниру. Нарок плануєм мац сладку кукурицу на ище векшей поверхносци, та посадзим и до бабовей загради – гвари Стефан и бешедує нам як пришол на идею купиц прашата.
– Роздумовал сом як себе назберац за мото крос моторку, хтору сом барз сцел, та ми оцец предложел най купим прашата. То ми добре звучало, а мали зме и празни кармики. Купел сом штверо прашата и попредал их кед виросли, а теди сом бул пията класа. Други рок сом купел ище пецеро. Старам ше о нїх и можем повесц же то нє даяка велька мудросц до крупари усипац кукурицу и ярец, помишац у мишальнї, концентрат купиц, накармиц их и чекац най вирошню – толкує Стефан и додава же у його дружтве скоро шицки пайташе уж ходза на польо, та ше розумя и нїкому нє нєзвичайне же вон ма таки нєкаждодоньово интересованя за єдного школяра основней школи.
Попри тим же гонї мото крос моторку по дильовох, понеже за воженє у явним транспорту ище вше нє ма досц роки, Стефан ше люби и скияц, шейсц роки ходзел и на аикидо, а дакус и на столни тенис. Дзечнє помага и оцови у його майсторскей роботнї.
– Оцец оправя трактори и польопривредни машини, а я му помагам кед мам кеди. Робим шицко цо треба, од колєсох по кабину на трактору. Цо ше дотика польопривреди, любел бим предлужиц тото цо уж робиме, алє же би ми то було лєм попри даякей другей роботи. Сцем закончиц електротехнїку, лєбо дияґностику. Кед бим научел тото робиц, думам же би то була добра комбинация за роботу з оцом, бо у пальцох уж мам – добре зна Стефан цо сце робиц у живоце, а вельке жаданє му и остац жиц на валалє.
Фолклор и друженє иду вєдно
Стефан уж роками ходзи на анґлийски язик и на фолклор, хтори и найволї од шицких секцийох.
– Почал сом ходзиц на танєц у першей класи. Любим танцовац и наступац, алє барз любим ходзиц на фолклор и пре друженє. З нашу хореоґрафку Андрею ше барз крашнє складаме. Велїм хибя хлапци у ґрупи, а нам дзивчата. Любим кед маме опущенши проби, алє и кед учиме нови хореоґрафиї, бо вец знам же ше рихта цошка вельке – гвари вон.
Сцел научиц и грац
Стефан барз жадал научиц грац на тамбури, та то и зробел кед бул шеста класа. Уписал ше до музичней школи и, гоч познєйше як цо ше звичайно дзеци уписую, швидко напредує.
– Тераз сом треца класа у музичней школи. Єден мой пайташ грал на басприму и вше сом ше, най так повем, пажерел, та сом ше надумал уписац до музичней школи ґу наставнїци Геленки Гарвильчак. Любел бим раз грац и у оркестру, кед будзе нагоди – приповеда Стефан.
