Зоз ґраньом по писку

1.7k Опатрене

Иван Медєши, у явносци ширше познати як Шукс, педаґоґ и литератор. Обявел штири кнїжки прози и поезиї, єдна видата у Словацкей. НВУ „Руске слово”, односно часопис МАК обявел його три кнїжки, медзи котрима и роман ґенерациї „Шпацири по сподку дунца”. Вєдно зоз Славком Винайом и Наталию Рибович, 2007. року подзелєли медзинародну награду за литературу „Алекандер Духнович” за кнїжку „Триолоґия”. Шукс автор коло котрого руска публика найвецей подзелєна – або ше з нєсцерпеньом чека його нове дїло, або з квашним виразом твари ше на його твори одмахує. А, ниа, цо вон гвари о себе.

ЛС У якей ши, тераз, животней фази?
Кафка раз написал же його професия и писанє то нє лєм два процивни ствари, алє вони ше и медзисобно виключую, зложел бим ше. Буковски спред себе поставял питанє же чи би творел зоз ґраньом по писку, кед би закончел на пустим острове. Я у тей хвильки на европским острове Сербия и гладни сом. После „Шпацирох по сподку дунца”, писал сом ище даскельо роки и видзи ми ше же тото пусте острово прияло досц шкоблєня зоз мою сламку. Мам жену, осеммешачне дзецко, гоби нам три раз на дзень єсц и кажди мешац рахунки плациц, пошвеценосц литератури нє бог зна як доприношела тому гобию.

ЛС Як творчосц? Пишеш дацо?
Мал сом поставени єден наївни циль после „Шпа­цирох”. Написац збирку поезиї, збирку приповедкох и єден роман. Тото сом витворел и мой лаптоп ше може пишиц зоз тим яки є богати знука. Писац сом уживал, а з обявйованьом причекам даскельо роки, або занавше, нє пре дачию зраду широких розмирох, алє так будзе найлєпше за шорови живот.

ЛС Цо читаш, слухаш, патриш?
Праве сом пречитал Турґенєва и озда нєт лєпшей думки праве за тот интервю як зоз конца того романа: „И после того чловек дожил преламанє, преламанє без котрого нє мож постац шорови чловек – престал думац о власним щесцу…”.
Ище даяки вредни споминаня кнїжки котри сом нєдавно почитал то: „Остатнє поглавє” Кнута Хамсуна, кажда його кнїжка вецей як добра, приповедки Реймонда Карвера, писма Буковского, Велш, Сароян, „Пше шерцо” Булґакова…
Видавательна хижа „Лом” ма дефинитивно найвецей виданя за мой смак. Тиж так, зявела ше и нова хижа „Booka”, котра обявює лєм нову литературу и ту єст велї интересантни ствари, наприклад фасцинатни фалат „Мали месар”. Но, єст ту и други добри хижи и виданя, a то уж сцеканє од теми.

ЛС Кед бизме сумировали упечатки после „Шпацирох”, як шицко тото прешло?
Добре було. Муши ше буц задовольни. Людзе ми приходзели зоз реакциями и вец сом ше знал опитац дацо зоз кнїжки най видзим чи нє циґаня же читали лєм же би нє добили єдинку, алє читало ше. Думам же мам право вериц же то було цошка нове, алтернативне и же то дас сто людзе почитали. Но, од теди прешли осем роки и то готове.

ЛС Читаш авторох цо пишу по руски? Як ци випатра руска меин-стрим сцена?
Меинстрим (або главни цек), шицки ми у истим котлє и шицки ми покус осудзени на ткв. андерґраунд. Кед пишеш/обявюєш и по руски, ту нє можеш чекац векшу публику од 100-200 людзох, найчастейше гет менєй. То може ошлєбодзуюцо дїйствовац на писателя котри нє чежи ґу помпезносци, пенєжу, квази велькосци и добре би було кед ше так похопи. Дахто може зоз тим жиц, дахто нє. Гоч як най є, нам потребни вецей добри кнїжки, прейсц тото троцифрове число читачох, а у медзичаше нє постац старлета, кловн, або воєни злодїй.
Видвоєл бим, заш лєм, Сашу Сабадоша, пред даскелїма роками видал добру (алє дакус крадку) збирку приповедкох, ма потенциял за добру литературу. Мире Джуня водзи интересантни живот и його даяка нова кнїжка би могла буц добра ствар. Жаль ми же нє постоя кнїжки Олеґа Колбаса и Славка Виная, ту бул можебуц найвекши потенциял за препород нашей литератури. Звонимир Няради тиж добре чувствовал цо то поетске у тим прекрасним живоце.

ЛС Як оценюєш руску сучасну литературу младих после „Гумна”, (Антолоґиї 1990–2010)?
Я барз „накруцам” же би цошка добре нове вишло. Єдна з наших вельких гришкох же цо ґод виходзи ми му даваме позитивну критику, а критика найлєпша кед є лєм конструктивна. Мнє барз помогли и даяки неґативни коментари. Велї млади (як и стари) верели до того цо ше им ”титрало” у тим нашим малим аквариюме и то их загамовало, або и загребало. Литература, же би була добра, муши буц число єден у живоце. Я дакеди 24 годзини штудирал лєм о литератури и цо ше шлїдуюце напише, або цо би було добре почитац же би отворело нови погляди, угли патреня и перспективи. Думам же велї нашо авторе мало читаю, а то нєобходне искуство за писателя. Треба читац сучасне, алє би познац и фундамент того як цо „Записи з поджемя” Достоєвского, або Кафкова „Метаморфоза”, Хамсунов „Глад”, Селиново „Путованя”. Треба одпатриц 500 култни филми, треба вислухац 1 000 култни музични витвореня, а ґу тому нє треба забуц и жиц живот. Дакеди ми ше видзи же даєдни авторе анї єден зоз тих аспектох нє маю.

ПОВЯЗАНИ ТЕКСТИ