РУСКИ КЕРЕСТУР – Остатнього викенду у авґусту почала и ламачка кукурици у рускокерестурским хотаре, преважно ше ламе кукурици котри садзени за чуванє у чардаку, медзитим єст и дзепоєдни поля на котрих кукурица такой и олупана.
Як дознаваме, кукурици потераз зродзели просеково коло 40 метери по гольту, єст и менши и векши приноси, котри по словох парастох задоволююци з оглядом на сушу, и на факт же у валалє нє було дижджу од 14. юния.
Попри тим, ище вше тирва жатва слунечнїку, чий урожай медзи 15 и 25 метери по гольту, а почало ше тлачиц и сою, чий урожай тиж рижнородни затераз медзи 10 и 18 метери по гольту. З оглядом на горучави, дошла и цвикла за виберанє, та уж цали тидзень як почала сезона вибераня цвикли.
Мож заключиц же у керестурским хотаре роботи у полним розмаху, обера ше паприґу, тлачи слунечнїк и сою, а кукурицу ше и лупа и ламе.