У Дюрдьове ше вше менєй обрабя загради, од дзешец лєм єдна обробена, а заш мож повесц же єст и тих хтори видза же праве зоз роботи у загради мож заробиц
Же злога, заєднїцка робота и почитованє у фамелиї барз важни, шведоча двойо млади котри жадаю научиц свойо дзеци же ше пре роботу нє треба ганьбиц, алє же тот хто вредни, вше найдзе способ як заробиц и за себе, и за своїх наймилших
Бранка и Желько Римарово зоз Дюрдьова од початку малженства, а то уж дванац роки, вєдно обрабяю заграду за власни потреби. Пред шейсцома роками на велько садзели кромплї аж у двох заградох, а того року, же би випочитовали рядошлїд пестованя рошлїнох на истей поверхносци, першираз посадзели цеснок. Гваря же нє побановали, а посадзели го у обидвох заградох котри обрабяю, на коло пейцсто квадратних метерох. При пестованю цеску нє мали почежкосци, чкодлївци го нє нападли, цеснок нє охорел, а нє було потреби анї додатно го залївац, понеже було дижджу кед тей заградковей рошлїни було найпотребнєйше за розвой, а то у маю. Видзи ше им же нє було даяки хороти, медзи иншим, и прето же го першираз посадзели.
– Потераз зме на тей поверхносци садзели кромплї, а понеже ше препоручує на кажди даскельо роки пременїц културу, одлучели зме посадзиц цеснок. Презнали зме ше и купели зме добру домашню сорту цеску, босут. Посадзели зме го з машину и можем повесц же за тераз наисце шицко пошло так як треба, од садзеня по предаванє, нє було бриґи. Влонї у авґусту зме виняли остатнї кромплї на тей жеми, а цеснок зме посадзели у октобру. У тим периодзе помали пририхтуєме жем за нови цеснок. Наисце го нє чежко пестовац, то може робиц кажде хто сце, лєм кед ма дзеки и сцелосци – гварел Желько Римар зоз Дюрдьова, продукователь цеску, котри зоз супругу Бранку пестує желєняву у обидвох заградох. Бранка ґаздиня и остава дома допатрац обисце и двойо малолїтни дзеци, а понеже дзеци виросли, лєгчейше єй и ма вецей часу за роботи у загради, дзе єй часто помага и швекра Станка.
– Супруг и я найвецей робиме у заградох, алє учиме и нашо дзеци же треба робиц и помагац, та ше и вони вецей раз ґу нам придружа. Супруг заняти, а швекра и я ґаздинї. Одвитує нам же цеснок мож допатрац даскельо годзини на дзень, або кажди други дзень, лєм на ньго нє треба забуц, треба му знац шора, а у роботи буц дисциплиновани – гварела Бранка и надпомла же вони тройо шицко робя – вибераю, одкладаю цеснок, а вец го и до варґочу заплєту. Бранка обачела же ше цеснок люби розвивац у мелкей жеми, та го треба частейше окопац.
Найвецей предаваю до валалу
У околїску, у заградох дзе нашо собешеднїки маю цеску, нїхто нє пестує желєняву, та и сами роздумую же можебуц праве прето у тей сезони нє було чкодлївцох, алє анї хороти.
– Цеснок зме нє oпирскали, бо нє було потреби. Предпоставяме же кед го и далєй будземе пестовац на тей жеми, о даскельо роки годно буц и пременки, хороти, чкодлївци, алє то ище увидзиме. Посадзели зме тот єшеньски цеснок, понеже є векши и гваря же є лєпши, а тото цо у тей роботи важне, то простор дзе ше го будзе чувац. Нє треба же би бул на громади бо вец поплєшнєє, а ми го сушиме у єдним оддзелєню дзе цуґ, вон виши на дескох. Кед слово о предаваню, з векшого го предаваме до валалу и то з дому, а за промоцию хаснуєме дружтвени мрежи. Предаваме го и до предавальньох овоци и желєняви, алє добре знаме же вец за нього достанєме коло трицец одсто менєй заробку. То нам нє завадза бо лєпша цена вимага и вецей анґажованя, а за таку роботу нєт вше часу – гварел Желько и предлужел же кажде хто ма заграду, може ю обрабяц кед сце и кед ма часу, бо тото цо на нєй посадзене може буц, як и им, додатне жридло финансийох. Вшелїяк же така робота вимага и потримовку фамелиї, и вец шицко лєгчейше.
Третман цеску по вибераню зоз жеми важни пре його виталносц, и же би бул за хаснованє голєм по децембер, а же би цо менєй каловал, медзи иншим и прето же концом рока починаю забивачки.
Кила цеску на початку авґуста була 500 динари, а венчик у котрим єст дзешец главки приблїжней велькосци коштал 600 динари. На самим початку сезони кед ше го виберало коштал 700 динари.
– З накупцами нє сотрудзуєме, понеже вони барз подценюю продукователя и продукцию вообще. Питали одо мнє же бим им предал цеснок по двацец, трицец динари за килу, так же нас накупци за тераз нє интересую.
Познате и тото же цеснок мож и сушиц и предавац го як осушени. Сухи цеснок часто хасную месаре у месарньох, бо им практичнєйше и робота им швидше идзе.
Менше закладанє, а векши заробок
Того року нє будземе куповац нашенє понеже маме свою репродукцию, та будземе и менєй укладац – гварел Римар котри того року уложел пенєж за копанє студнї у загради, т.є. воду за залїванє. Гоч ше у тим року додатно нє залївало, бо падали дижджи кед цеску було найпотребнєйше, у маю, нє кажди рок исти, нє мож знац як будзе о рок, або о два, та ше, як гвари, треба порихтац.
Попри босуту, Римарово мали ище єдну сорту цеску, алє менше количество. Слово о джиновским сибирским цеску – елефант зоз файти порилука, котри нє ма таки моцни и оштри смак и пах як домашнї цеснок. Єдна главка цеску елефанту, котри вельки як сциснута песц одроснутей женскей особи, кошта сто динари по фалату.
– Обачели зме же тоту рошлїну нє треба вельо допатрац, а заш лєм, лєпше мож зоз нєй заробиц як зоз кромпльох. Кед посадзице килу цеску, тельо ше множи зоз седем и достава число яки би требал буц урожай. Тото цо зме заробели того року зоз цеску, потрошели зме на пребуванє у єдней банї у Сербиї. Нє чежко нам ше закладац и потим вєдно одпутовац, а дзекуюци тому же кажде у роботи участвовал тельо кельо могол. Нєт нїч красше од того. Того року зме о морю нє роздумовали, алє о рок хто зна як будзе. Фамелия нам на першим месце, а така робота и заробок з роботи у заградох ше наисце вше зда и нам, и дзецом – гварела на концу Бранка Римарова.
Жем мож вихасновац и за капусту
Тоти котри жадаю и маю часу за таке, после вибераня цеску у юнию на исту жем садза капусту, та ю пестую по єшень, а после капусти у октобру, або аж и у новембру садза цеснок. Жем пред садзеньом треба поорац, вифрезовац и на час погноїц. Римарово на жем розруцую хлївски гной на кажди три, або штири роки, бо є моцнєйши як штучни.
