У рамикох Ерасмус+ проєкту мобилносци школярох, прешлого тижня, дзевецеро школяре од 12 по 14 роки зоз штирох школох зоз Шведскей, а у провадзеню своїх наставнїкох, пребували у Основней и штреднєй школи зоз домом школярох „Петро Кузмяк” у Руским Керестуре.
Под час пейцдньовей нащиви, од пондзелку, 28. септембра, по пияток 2. октобра, шведски и керестурски школяре, през заєднїцки годзини и роботнї, обрабяли теми отримуюцого розвою, зоз окремним акцентом на еколоґию, алє и на сотруднїцтво и упознаванє тих двох образовних штредкох. За заєднїцки активносци вибрани и представнїки школярох керестурскей школи, а главна координаторка спред школи „Петро Кузмяк” була Лїляна Рудакиєвич.
Од початку їх приходу, як потолковала Рудакиєвичова, орґанизовани активносци у хторих ше школяре медзи собу упознавали, нащивели Кулу дзе у предавальнї глєдали продукти зоз еколоґийнима ознаками, после чого о тим отримали и презентацию. Школяре мали и роботнї о условийох хтори потребни за пестованє рижних рошлїнох на тим подручу, нащивели польопривредне ґаздовство и рибалов у Руским Керестуре, отримали и заєднїцку шветочну вечеру, та з тей нагоди шведски школяре пририхтали традицийни єдла своєй держави, док домашнї представели свою кухню. Остатнї дзень за школярох и наставнїкох орґанизовани приєм у Амбасади Кральовини Шведскей, а потим обишли и Беоґрад, односно Авалску турню и Калемеґдан.
– У нашей заєднїци хтора уключена до Ерасмус плус проєктох, сцели зме мац и школу зоз Сербиї хтора роби зоз питанями отримуюцого развою, а то праве ваша школа у Керестуре. Сцели зме нашим школяром указац и иншаки бок Европи, нє лєм городи як цо Берлин, Париз, Барселону… Школяром интересантне упознац ше зоз тим як ваша школа функционує, упознали Керестур, Кулу, пойду и до Беоґраду, а интересантне им и же ше ту настава отримує на меншинским язику. Звичайно ше случує же школяре мобилносци ше уж другого дня питаю дому, влапи их носталґия, медзитим, таке дацо зме у тей ґрупи нє обачели – гварел медзинародни координатор обласци Ґаґнеф зоз Шведскей, Йоран Анлайн, а хтори керестурску школу першираз нащивел того року у маю, зоз цильом же би ше упознал зоз єй роботу.
У Шведскей, еколоґийни питаня барз унапредзени, понеже то єдна зоз перших державох у Европи хтора почала запровадзовац такволани еко-лейблинґ, односно означованє продуктох и услугох хтори маю менши уплїв на природу, сортиранє одпаду иснує од 1992, а шицко тото на барз високим уровню.
– По школох школяре рециклую шмеце, то цошка цалком природне. Поведзме, шицки нови обєкти хтори ше будує муша мац соларни панели и дежава у тим финансийно помага. Кед зме мали задаток зоз школярами пренайсц продукти у предавальньох зоз еколоґийнима ознаками, у вас зме нашли осем, а у Шведскей их єст прейґ сто. Прето думам же добре и за вашо и нашо дзеци же би видзели даяки предносци або нєдостатки у двох державох, и же би ше витворело сотруднїцтво – визначела наставнїца шпанского, шведского и анґлийского, Моника Вучич Нилсен.
Окремна часц проєкту будзе предлуженє сотруднїцтва после законченей нащиви, прейґ платформи „eTwinning” – европскей онлайн платформи хтора оможлївює школяром и наставнїком, зоз рижних жемох, вєдно реализовац образовни проєкти и черац искуства. Школяре прейґ тей платформи вєдно буду креировац отримуюци город у бависку „Minecraft”, зоз чим на креативни способ, а през бависко, укажу як розумели поняце отримуюцого розвою и так годни применїц знанє здобуте под час проєкту.
През заєднїцки активносци уча о отримуюцим розвою
