НОВИ САД – Медзинародни саям лова и риболова и Саям еколоґиї отворени стреду 30. септембра, на Новосадским сайме. На нїм ше представя вецей як 120 викладаче зоз Сербиї, Австриї, Горватскей, Русийскей федерациї и Словениї, а участвую и 50 делеґациї з коло 50 африцких жемох.
Саям шветочно отворела предсидателька Покраїнскей влади Мая Ґойкович хтора наглашела же ЛОРИСТ през вецей як пол вика прероснул рамики традицийней саямскей манифестациї хторей фокус на лову и риболову и постал место дзе ше стретаю еколоґия, защита природи, наутика, спорт, рекреация и туризем.
Предсидатель Скупштини АП Войводини Балинт Югас медзи иншим указал на значносц одвичательного ґаздованя з природнима ресурсами за розвой ловства, туризма и локалних заєднїцох, док ґенерални директор Новосадского сайма Слободан Цветкович наглашел же тогорочне понуканє преширене за наутику, кампинґ и ґлампинґ, ту вше и традицийна опрема за лов и роболов, алє и змисти зоз еколоґиї.
Штварток, медзи иншим, отримана фахова конференция „Нови Сад – город влажних подручох – вода, природа и здравє у пременлївей клими”, а пияток ше бешедовало як мож зменшац заґадзеня з микропластику, та и о тим як ховац, старац ше и ловиц сарняки.
Отримани и Днї Африки, то задумка по конєц приредби – представиц їх дзивину, предавац предмети и шмати, а танцоше були з Ґани.
На соботу и на нєдзелю нащивителє годни провадзиц отворене першенство Войводини у препонским шедланю, на нєдзелю и ревию ловарских псох, а праве остатнї дзень, нєдзеля будзе пошвецени дзецом, виставом, роботньом, квизом и змаганьом. Єст цо и поєсц и попиц.
Цена уходнїци 800 динари, орґанизовани колективни нащиви – 450 динари по особи, док на нєдзелю цала фамелия може войсц на саям зоз лєм єдну купену уходнїцу. Кажда уходнїца, кед ше ю пополнї и положи до шкатули, будзе участвовац у наградним бависку.
