ВЕРБАС – Традицийна смотра Жимскей служби Явного комуналного подприємства „Комуналєц” Вербас отримана у кругу Дїловней єдинки „Чистота”, на котрей потвердзене же Жимска служба порихтано дочекує перши шнїг, з добре пририхтану механїзацию и достаточним количеством солї, ризли и других средствох.
Смотри Жимскей служби присуствовали предсидатель Општини Вербас Предраґ Роєвич, о.д. директора ЯКП „Комуналєц” Иґор Шкундрич, началнїк Полицийней станїци Вербас Деян Дробняк, як и други функционере и службенїки явней управи и державних орґанох.
По словох о.д. директора „Комуналєц” Иґора Шкундрича, тото вербаске подприємство порихтане одвитовац на шицки хвильово условия з роботнїками и пририхтану комплетну механїзацию, на лаґеру маю 61 тону солї, 16 тони ризли и два тони маґнезиюм-хлориду, а додатно обезпечели 350 тони солї, 50 тони ризли и штири тони маґнезиюм-хлориду. Орґанизовани и зменски служби и розпорядки роботох, визначел, драги о котрих ше стараю ясно дефиновани, а кед будзе потреби, очисца и часци котре нє у їх компетентносци же би гражданє були безпечни.
Предсидатель Општини Вербас Предраґ Роєвич з тей нагоди гварел же ше з општинского буджету видзелює значни средства кед у питаню Жимска служба и безпечносц транспорту, та так того року видвоєне вкупно 10 милиони динари. Жимска служба будзе водзиц рахунок о транспортнїцох длужини 210 километери.
Порихтаносц Жимскей служби оценєли и представнїки Полицийней станїци Вербас, котри под час тирваня жимскей сезони буду у нєпреривней координациї з роботнїками на драгох того вербаского Явного комуналного подприємства.
Зоз смотри апеловане и на учашнїкох у транспорту же би почитовали одредби Закона о безпечносци у транспорту, же би на превозкох хасновали жимску опрему и у каждей хвильки ше справовали у складзе з условиями на драгох, пренєсол општински сайт.