РУСКИ КЕРЕСТУР – Вчера вечар, пред шветом Св. оца Миколая по григориянским календаре, у керестурским Катедралним храме, хтори ноши мено того святого, було Всеночне, а потим и програма Миколайови, котри дзецом подзелєл дарунки.
Всеночне предводзел преосвящени владика кир Георгий Джуджар, з домашнїм парохом о. Михайлом Малацком и капеланом о. Владимиром Медєшом.
По Всеночним виронаучни дзеци зоз шестрами служебнїцами за 300 дзеци и їх родичох пририхтали пригодну програму з нагоди св. Миколая, котрим вон потим подзелєл дарунки.
Подобну програму дзеци пополадню виведли и старим на їх друженю у Каритасу, котрих тиж нащивел и св. Миколай.
Нєшка, на саме швето, Служби Божо буду на 8 годзин, Архиєрейска, хтору будзе служиц владика Георгий на 10, а вечарша на 15 годзин.
На ютре, на нєдзелю, у просторийох Каритасу од 8 до 13 годзин будзе традицийни Крачунски вашар, на хторим годно купиц рижни крачунски прикраски и дарунки, а годно дац и добродзечни прилог за фамелиї котрим то потребне.
