4. НОВЕМБЕР – На нєшкайши дзень народзел ше Митро Надь.
1886 – Народзел ше руски поет Митро Надь (Миклошевци, 4. новембер 1886 – Петровци, 8. фебруар 1962), бул ремеселнїк и културни дїяч. Основну школу започал у Миклошевцох, а закончел у Петровцох, скравецке ремесло виучел у Шваба Антеса, у Вуковаре. Як калфа робел у Заґребе, Ґрацу, Бечу и Стразбурґу, добре научел бешедовац по нємецки, а участвовал и у Першей шветовей войни, перше на галицким, а вец на италиянским фронту. Од 1922. року робел як приватни скравец у Петровцох, и бул єден з активистох Руского народного просвитного дружтва (РНПД). После Другей шветовей войни бул єден з найвреднєйших активистох Рускей матки, и длугорочни предсидатель КУД Яким Гарди у Петровцох. Митро Надь умар 8. фебруар 1962. року, спочива на Петровским теметове.
1890 – У Лондону отворена перша линия под’жемней електричней желєзнїци у швеце.
1922 – У долїни кральох при Луксору у Єгипту анґлийски археолоґ Гауард Картер пренашол гроб фараона Тутанкамона.
1946 – Основани УНЕСКО (United Nations Educational, Scientific and Cultural Organization), Орґанизация Зєдинєних нацийох за образованє, науку и културу, пре ришованє проблемох образованя у жемох хтори були потрафени з Другу шветову войну. Познєйше задатки УНЕСКО преширени, окреме у защити културного и историйного блага и черанки наукових роботнїкох и публикацийох.
Нєшка Шветови дзень климатских пременкох.