НОВИ САД – Вишла авґустовско-септемберска Заградка, а вєдно з ню и дарунок – розпорядок годзинох по руски.
На початку того двочисла обявени конкурс за лоґо, односно Заградков защитни знак з нагоди 80-рочнїци, хтора будзе означена нарок. Конкурс отворени за шицки дзеци основношколского возросту и тирва по 31. октобер.
Госци и новосци даваю прегляд лєтних збуваньох, як и рубрика Сцеме знац и упознац, док у Читальнї мож пречитац литературу за дзеци, а медзи нїма и писньочку у сличкох. Мала заградка понука креативни задатки и писньочку за наймладших, а вецей боки и у тим Заградковим двочишлє пошвецени школярским и оводарским литературним и подобовим роботом.
У Заградковей рубрики Док вирошнєм будзем… зубарка Наташа Гайдук дзецом представела свою професию, а забавни боки у тим двочишлє забераю аж штири боки и у нїх мож ришиц вецей интересантни задатки.
Радио у Заградки понука розгляднїцу зоз путованя, док у рубрики Мой любимец Дабриа Паланчаи зоз Суботици приповедала о свойому заяцови.
На насловним боку школяре першей класи у Руским Керестуре зоз учительками Марию Колошняї, Лидию Милеуснич и учительом Марком Новаковичом.
