НОВИ САД – На Радио програми по руски нєшка на 12:30 годзин, будзе емисия Дом и фамелия, а на 21:30 годзин Емисия за младих.
У нєшкайшей емисиї Дом и фамелия будзе ше бешедовац о пририхтованю за наиходзаци швета котрим ше найбаржей радую наймладши. Кед приду швета, вше ше апелує же би ше вецей помагало людзом котри маю менєй и котри у потреби. Гоч треба помагац през цали рок, швета вше нагода же би ше подаровало дакус вецей. Андреа Югик и Мария Малацко зоз Руского Керестура шестри котри орґанизую гуманитарни базари и на таки способ помагаю хорим дзецом и особом у своєй општини. Кед придзе жима, велї пензионере препровадзую час дома, а пензионер Владимир Дудаш зоз Руского Керестура гвари же найважнєйше днї виполнїц зоз тим цо чловек люби робиц. Тиж пензионерка Гелена Медєши, зоз Руменки люби квеце, алє и овоц, та тераз прави маджун зоз японских яблукох котри посадзела у своїм дворе. На концу емисиї будзе и рецепт за медовнїки.
Емисию Дом и фамелия мож послухац кажду стреду на 12:30 годзин на УКТ габох радия РТВ на 92, 100 и 107,1 мгг. Реприза емисиї на соботу на 7 годзин, а мож ю послухац и на одложеним слуханю на сайту Радио-телевизиї Войводини. Редакторки емисиї Наталия Дудаш и Саня Маркович.
У Емисиї за младих, нєшка на 21:30 годзин, будзе слова о отриманей 4. Шветовей ради русинскей младежи, а годно послухац и о интересантним путованю до Шпаниї. Закукнє ше и до швета музики дзе млади погуторя на хторих инструментох граю.
Емисия за младих ше емитує премиєрно каждей стреди на УКТ габох радия РТВ на 92, 100 и 107,1 мгг, на 21:30 годзин и репризно штварток на 12:30 годзин, а мож ю послухац и на одложеним слуханю на сайту РТВ. Редакторки и водительки емисиї Ванеса Медєши и Мирела Тимко.
