ВЕРБАС – Школяре Основней школи Братство єдинство зоз Коцура участвовали на традицийним Єшеньским литературно-подобовим конкурсу Явней библиотеки Данило Киш зоз Вербасу.
Спомнута вербаска установа розписує таки конкурс за школярох основних и стреднїх школох з териториї општини Вербас, а того року бул розписани на здогадованє сербского поету Лазу Костича и на єдну з його писньох.
Школяре писали и мальовали на тему Медзи гвиздами, а жири вибрал найлєпши роботи. Медзи наградзенима були и школяре коцурскей Основней школи.
Перше место за свою литературну роботу освоєла школярка трецей класи Тара Бокан, а друге место тиж школярка трецей класи Яна Новта.
Перше место за свою подобову роботу освоєла школярка першей класи Исидора Секулич.
На уручованю наградох найуспишнєйшим школяром були и їх менторки Виолета Рашета и Мария Полдруги.
