КОЦУР – На швето Воведениє, 4. децембра у просторийох парохиялного Каритасу „Марийов дом” у Коцуре преславени Дзень коцурского парохиялного Каритасу, котри активисти и волонтере уж седми рок означую.
Присутних, котри пришли вєдно означиц тото швето, привитал координатор коцурского парохиялного Каритасу Янко Салонтаї. Як гварел, то нагода же би ше шицки здогадли Марийового прикладу, а тиж спомнул и велї активносци котри ше у Каритасових просторийох запровадзує.
Означованю Дня Каритаса вєдно зоз активистами и волонтерами присуствовал и капелан коцурски о. Иван Дацешен, члени Церковного одбору коцурскей грекокатолїцкей церкви, як и шестри зоз Манастиру шестрох служебнїцох Непорочней Дїви Мариї.
Парохиянє того пополадня препровадзели приємни хвильки у просторийох коцурского парохиялного Каритасу, зоз думками и бешеду о значеню того швета. Слани и сладки лакотки котри сами волонтере приготовели и збогацели преславу того дня, як го наволали – Кирбай у коцурским Каритасу.
