БИКИЧ – З нагоди означованя 81-рочнїци од ошлєбодзеня валалу у Другей шветовей войни, венци на памятнїк погинутим борцом, вчера, 4. децембра, спред локалней самоуправи и борецкей орґанизациї положел Цвєтко Ракич, спред Месней заєднїци Бикич Деян Бобаль, а венєц положели и представнїки Здруженя сербско-русийского товаришства.
Школяре Основней школи „Сримски фронт“, Подручне одзелєнє Бикич виведли пригодни рецитал.
Як и каждого року парох о. Владимир Еделински Миколка служел панахиду при памятнїку за борцох. Пред тим у церкви Успеня Пресвятей Богородици о. Еделински служел Службу Божу на швето Воведениє Пресвятей Богородици, цо дакеди до Другей шветовей войни, бул и Кирбай у тей церкви.