Тимска робота ключ успиху

автор Л. Вереш
329 Опатрене

Робота дохтора у наглей помоци зоз собу ноши рижни виволаня. Найвекше виволанє то задоволїц потреби шицких пациєнтох, цо окреме чежко, понеже у змени роби лєм єдна екипа хтора задлужена за три валали. Робота у наглей помоци ма и свойо красши боки хтори оставаю шицким у паметаню, окреме кед ше у санитету народзи беба.

У найкритичнєйших хвилькох живота пациєнта, дохторе хтори заняти у наглей помоци, вше на першей ґарадичи медицинскей помоци. Їх каждодньовосц виполнєта зоз нєизвесносцу, под стресом су бо треба швидко реаґовац, понеже часто кажда секунда може буц пресудна. Вони тоти хтори приноша одлуки под прициском, даваю першу помоц и стабилизую стан пациєнта пред тим як го пошлю далєй на лїченє. Мож повесц же їх робота нє лєм професия хтора вимага огромну одвичательносц, емпатию и пошвеценосц, алє и вельо вецей. Кажди виратовани живот шведочи о їх шмелосци и фаховосци, покля вони сами часто оставаю „нєвидлїви” героє нашого дружтва.

Наша собешеднїца, др Леона Иван зоз Дюрдьова, праве єдна з тих героїньох – дохторка у наглей помоци у Дому здравя Жабель.

Медицина победзела

Ище як школярка основней школи була приклад пошвеценосци и совисносци. Всестрана и любопитлїва, лєгко звладала школски обовязки, и якошик ше и предпоставяло же основну школу закончи зоз найвисшима оценами. Кед требало одлучиц кадзи далєй, нє мала ясну идею о своїм будуцим занїманю. Лоґични вибор теди була ґимназия, та ше так и уписала до Ґимназиї „Светозар Маркович” у Новим Садзе, дзе предлужела виглєдовац тото цо ю интересовало.

По законченю стредньошколского образованя, длуго ше ламала по хторей драги ма рушиц. Прицаговали ю два цалком розлични науки, право и медицина. Мала потримовку єй найблїзших хтори верели до єй потенциялу, та ше наша собешедїца, заш лєм, опредзелєла же будзе студирац медицину.

– Накадзи сом закончела факултет, нє могла сом достац такой роботу, понеже у тим периодзе були забрани даваня роботи, та сом волонтирала, думам же то було коло два и пол роки, у амбуланти у Дюрдьове. Колектив бул барз добри и наисце сом вельо того научела од дохторкох и од шестрох – гварела дохторка и предлужела бешедовац о тим же робела и як дохторка на екскурзийох.

– То ище єдно искуство хторе ми наисце барз миле, а здобула сом го кед сом почала робиц як медицинске провадзенє на дзецинских екскурзийох. Без огляду на виволаня хтори ма тота робота, вона ми принєсла и драгоцине искуство, як и велї красни памятки и нови познанства – гвари вона.

После волонтираня млада дохторка достала свойо перше роботне место у общей медицини, алє уж после двох мешацох, Леона прешла робиц до наглей помоци, и як нам гварела, тот период памета як барз стресни. Бала ше же як то будзе шицко випатрац, понеже єй шицко було нове, алє добри колектив шицко ришел. Дохторка полюбела тоту роботу и уж дзешец роки роби у наглей помоци.

З тимом наглей помоци

Кажди дзень иншаки

– Найинтересантнєйше у моєй роботи тото же нєт правила як будзе випатрац єден мой роботни дзень у швидкей помоци. Може ше случиц же накадзи превежнєме змену, шедаме до санитету и по даскельо годзини зме на терену, а заш ше може случиц же зме по даскельо годзини у амбуланти. Барз, барз ридко ше случи же вноци нє идземе на анї єден терен, док през дзень ше по тераз тото нїґда нє случело. Дакеди  и по штири раз на дзень вожиме пациєнтох до Нового Саду, а дакеди прейду даскельо змени же нє одвежиме анї єдного. Така нам динамика роботи – потолковала дохторка.

До наглей помоци ше найбаржей явяю пациєнти хтори маю епидемийски хороти, як цо ґрипа, чуренє з носа и кашель, алє ше явяю и пациєнти хтори маю проблеми зоз прициском. Часто помоц глєдаю и пациєнти зоз покалїченями, окреме у сезони, кед ше почнє робиц у загради и на польох.

Як нам наша собешеднїца гварела, робота дохтора у наглей помоци зоз собу ноши рижни виволаня. Найвекше виволанє то швидко задоволїц потреби шицких пациєнтох, цо окреме чежко, понеже у змени роби лєм єдна екипа хтора задлужена за три валали. Часто ше случи же санитет нє шлєбодни, цо значи же треба швидко приношиц одлуки о приоритетох и источашнє остац змирени под прициском.

– Свидоми зме же людзе обчекую же бизме пришли цо скорей, алє дакеди єдноставно нє можеме сцигнуц такой, и то зна буц барз стресне – припознава наша собешеднїца.

Заш лєм, робота у швидкей помоци ма и свойо красши боки. Найкрасши хвильки хтори оставаю шицким у паметаню, то кед ше народзи беба у санитету.

– То хвильки пре хтори видзим кельо значна тота моя робота. Вше кед чуєм плач новонародзеного дзецка, почувствуєм огромну радосц и пиху, нє лєм я, алє и цала екипа, поготов, кед шицко прейдзе так як треба – гвари дохторка з ошмихом и предлужує же єй таки ситуациї, гоч их ридко кеди єст, даваю векшу мотивацию за роботу и якиш порив же би каждодньово давала шицко од себе.

Шицки робиме як єден

У розгварки зме дотхли теми о тим яка важна тимска робота у наглей помоци.

– Окрем индивидуалного закладаня, у наглей помоци тимска робота барз значна. Без добрей екипи, нїч бизме нє посцигли. Нашо технїчаре барз добри и искусни и вше можем раховац на їх помоц и потримовку. Шицки робиме як єден, прето же у такей роботи нєт места за гришки – наглашела дохторка Леона.

Леона з колективом на одпочивку у природи

Важни баланс

Стрес хтори приноши робота у наглей служби наша собешеднїца успишно превозиходзи дзекуюци активносцом хтори ю виполнюю и опущую. Шлєбодни час преводзує так же ужива у путованьох, у друженю зоз приятелями и зоз своїма шпивачками. Дохторка визначела и тото же треба знац як ше опущиц и „наполнїц батериї”, понеже така робота од  чловека тото и вимага.

Єдна з причинох пре хтори ше єй удава балансовац медзи роботу и приватним животом то флексибилносц єй роботного розпорядку. После дньовей змени, хтора тирва дванац годзини, дохторка двацец штири годзини шлєбодна, после хторих идзе до ноцней змени. Ноцна змена тиж тирва дванац годзини, алє после нєй ма павзу седемдзешат два годзини. Тот ритем оможлївює нашей собешеднїци же би ше цалком пошвецела роботи кед є на длужносци, алє и же би ше одпочинула и квалитетно препровадзела час теди кед є нє на роботи.

ПОВЯЗАНИ ТЕКСТИ