НОВИ САД – Новемберске, єденасте число часопису МАК приноши велї теми, а фокус на двох вельких подїйох хтори означени у новемберу.
На початку мож видзиц и пречитац хронолоґийни инфоґрафик и текст о студентских протестох у Сербиї понеже ше у новембру означело рок як спадла стреха на Гайзибанскей станїци у Новим Садзе и од першей блокади факултету.
У рубрики Драгопис мож пречитац путованє Марини Надь нє лєм по державох, алє и по концертох. У тим тексту, авторка окрем о своїх упечаткох зоз наступох шветово познатих музичарох пише и о способу роздумованя хторе помага, або одмага же би особа почитовала свойо искуства, та и живот.
Кристина Чизмар предлужує свойофайтову триолоґию написох о кнїжкох. У тим чишлє вибрала шейсц кнїжки хтори мож читац кажди дзень.
Друга главна нїтка у новемберским числу МАК то початок ґлобалней кампанї „16 днї активизму процив насилства над женми и дзивчатми“. Читаче з тей нагоди можу пречитац текст о кампаньох хторим циль злєпшанє ровноправносци женох, а то Медзинародни дзень дзивчатох (хтори ше означує 11. октобра) и спомнута кампаня хтора почина 25. новембра, а закончує ше 10. децембра.
Визуал „Дзвигнї глас“ направела Сара Планчак – сам визуал составени зоз змоцнююцима порученями процив родно заснованого насилства.
Ту и напис зоз упечатками о тогорочним Водова фесту, рубрики „Емисия за младих у МАК-у“, „МАК-ов лексикон“, „Нїби гумор“ и „Вецка нїч у МАК-у“, як и проза хтору пишу млади.