Отримани „Поетски нїтки Меланиї Павлович”

автор сас
1k Опатрене

ДЮРДЬОВ – У Основней школи „Йован Йованович Змай” у Дюрдьове вчера, 20. октобра, отримана програма у рамикох 11. „Поетских нїткох Меланиї Павлович”, у орґанизациї Дружтва за руски язик, литературу и културу и домашнєй школи.

На програми були школяре з руских оддзелєньох и школяре котри руски язик виучую факултативно, а привитала их наставнїца руского язика Мария Самарджич.

У програми участвовали штеранацецеро рецитаторе, котри рецитовали писнї руских поетох, а найвецей твори Меланиї Павлович. Участвовала и Елена Велькович, наставнїца болгарского язика у єдней новосадскей школи, котра бешедовала о виучованю вецей язикох у Войводини, медзи нїма и руского и болгарского. Школяром указала болгарску азбуку и єй подобносци з руску, а на концу вирецитовала кратшу писню на болгарским и бешедовала з дзецми.

Награду „Амалия Хромиш” як найвирнєйша и найвреднєйша читателька кнїжкох по руски зоз школскей библиотеки достала Мария Горняк, школярка седмей класи руского оддзелєня, а Награду єй уручела секретар Дружтва за руски язик, литературу и културу Ирина Папуґа.

Тиж так, Папуґова гварела же окремне припознанє будзе уручене и музичарови Михалови Лїкарови за помоц у збераню материялу за виробок 21. числа Зборнїку Дружтва „Студия Рутеника”, а библиотеки Школи подаровала вецей кнїки.

ПОВЯЗАНИ ТЕКСТИ