РУСКИ КЕРЕСТУР – Пред даскельома днями у центру валала оправени букви на напису Руски Керестур, понеже перша и остатня очкодовани концом прешлого року. У медзичаше, стреду, 23. априла рано, як нам явел директор ЯКП „Руском” Владимир Олеяр, замерковал же на тих словох цошка було залїпене та кед пошол опатриц видзел же скоро цали центер валалу, а и ширше, бул полїпени зоз белавима налїпками. Облїпени були бандери, транспортни знаки и жвератка, хижи и олуки, та и памятнїк погинутим борцом у парку.
– Думам же то нє у шоре и думам же бизме Керестур требали зачувац од шицкого. Окреме ми завадза же хтошка полїпел памятнїк погинутим борцом, кед знаме же вони дали свой живот за нашу шлєбоду. Попри тим, то и додатна робота за „Руском” понеже тераз мушиме тото познїмац. Думам же треба же бизме зачували наш валал без огляду на политични становиска и думам же таке по валалє нє треба робиц – поручел Владимир Олеяр.
Секретар Месней заєднїци и заменїк предсидателя СО Кула Михайло Пашо тиж апеловал же би ше таке нє робело и додал же за кажду файту оглашкох и обвисценьох єст за тото предвидзени места на вецей локацийох.
– Я нє почитуєм и нє потримуєм таку файту даякого реваншизму лєбо справованя. Виберанки прешли, слава Богу, прешли у миру, яким – таким, алє зачувани мир у Керестуре. У валалє треба зачувац мир, толеранцию и почитованє. Тоти налїпки полїпени и на транспортних знакох цо може привесц и до нєщесца, а тото же полїпени памятнїк то за кажду критику. Замодлєл бим шицких, без огляду на политичне опредзелєнє, же би ше таке вецей нє повторело – поручел Михайло Пашо.
З оглядом на тото же на налїпкох пише „Од Кули рушело” и „Студенти победзую”, цо були пароли студентскей лїстини на локалних виберанкох, глєдали зме и коментар од локалней орґанизациї „Керестур млади” по тим питаню.
„Лїпенє налїпкох на явних поверхносцох то цошка цо може зробиц було хто и над чим ми нє маме нїяку контролу. Акция лїпеня налїпкох рушела зоз инициятиву Беоґрадских и Новосадских факултетох хтори зоз таку ґерилску акцию жадали подзвигнуц свидомосц народу хто наисце будзе прави побиднїк на наиходзацих парламентарних виберанкох. Окреме индикативне тото же представнїки СНС одлїпюю нашо налїпки ширцом Кули. То, медзитим, нє виключує можлївосц, напроцив, озбильно ю отвера же праве вони тоти хтори налїпки полїпели на спомнути локациї же би потим пробовали одвичательносц преруциц на нас. Вериме же налїпки нє найвекши проблем хтори маме, як у валалє так и у општини. Место же би ше занїмали зоз правима проблемами гражданох, вони ше одлучели занїмац зоз налїпками и ґерилскима акциями хтори нїкого анї нє загрожую анї нє етикетираю”, наводзи ше у сообщеню локалней орґанизациї „Керестур млади”.
