Капча з тинейдж ґенерацию (V)

автор С. Фейса
215 Опатрене

Остатнє число МАК-у 2013. року реализовала редакторска екипа: Сенка Надь, Цецилия Надь и Мая Зазуляк, хтори тедишньому редакторови др Борисови Варґови були, єден добри период, помоцнїци. Уведол их до МАК-у, и охабел зоз добрим знаньом новинарскей професиї, а вон пошол на место главного и одвичательного редактора тижньовнїка „Руске слово”.

Мая Зазуляк (Гарди) надалєй подписує редакторску роботу Мултимедиялного културно-политичного часопису за младих, збера коло себе тим людзох хтори вєдно зоз ню правя МАК по своїм смаку, прилагодзени младежи

Визуални випатрунок МАК-у у новим милениюму постава барз важни, а нова редакторка того часопису то часто спомина, прешвечена же слика и дизайн важнєйши и од самого текста. Ясне же и змист нє шмел и нє могол буц спод уровня бистрей младежи, алє Зазуляковей було на розуме перше тото же читачох тот часопис муши прицагнуц зоз своїм випатрунком же би го вообще вжали до рукох. МАК теди ище вше нє виходзи кажди мешац.

На випатрунку часописа, Мая роби вєдно з ґрафичним дизайнером Златком Емейдийом, хтори з МАК-ом почал сотрудзовац 2014. року. Нєодлуга, точнєйше, у двочислу януар-фебруар 2015. року МАК видруковани на иншаким паперу и з новима рубриками, а од  2016. року ознова почина виходзиц кажди мешац, як мултимедиялни  часопис за младих.

 – Спущели зме долню гранїцу цильней ґрупи читачох, же би ознова часопис бул прилагодзенши тинейджером, студентом и другим младим, хтори го можу почац читац такой после „Заградки”. Окрем нових рубрикох МАК обрабял штредньошколски и студентски теми, представял младих уметнїкох, спортистох, музичарох, активистох, успишних школярох, студентох итд. Активно уключел руских ґимназиляцох, хтори МАК и теди и тераз хасную и у настави – гвари донєдавна редакторка МАК-у, Мая Зазуляк Гарди.

Мая и Златко

МУШЕЛ ВОЙСЦ ДО ВИРТУАЛНОГО ШВЕТА МЛАДИХ

Так як и у велїх МАК-ох до пред осем роками, (2014) сотруднїцтво з младима ше предлужує, у його реализациї участвую млади зоз вецей местох, рочнє коло 40–50 особи и праве МАК тот хтори их на своєродни способ повязує. Та заш лєм, нє було го лєгко витвориц, обдумац.

– Нєшка нє барз подзековне ушорйовац єден младежски часопис, понеже досц чежко знац цо их може заинтересовац, нєсподзивац попри шицких информацийох хтори ше им понука, кед о даяким збуваню, лєбо дачиїм успиху видзиме тото у истей хвильки на дружтвених мрежох и можеме шицко дознац. Праве прето и МАК мушел войсц до виртуалного швета, до мобилних телефонох младих. На рускословским сайту уж роками мож читац МАК и у електронскей форми, як и поєдинєчни тексти з каждого числа, а ту мож найсц и МАК-ово додатки – кнїжки и визуални публикациї з едициї MAKoff и MAKartoff, a онлайн мож и слухац коло 20 музични албуми и синґли хтори вишли у едициї MAKCD. Статистика указує же одкеди су положени на сайт, слухани су коло 27 000-раз – гвари Мая  и надпомина же и попри друкованей форми и на сайту, МАК „жиє” и на дружтвених мрежох, цо  нєшка, поготов при младих, нєобходне и барз значне. Вона твердзи же кед би нє бул там, мож повесц же як кед би анї нє постоял.

Рoзвой технолоґиї и интернета принєсол вельо доброго и за МАК, окреме тото же мож дойсц до вельо вецей людзох, лєгко дойсц до темох, сотруднїкох, собешеднїкох, медзитим то подрозумює и тото же МАК вецей нє може буц лєм як друковани медий, муши понукац и пласовац и иншаки змисти – прешвечена и теди и тераз Зазуляк Гардийова.

И Мая мала добри тим младих коло себе, та окрем двох спомнутих Надьових помоцнїцох и Емейдия у перших даскелїх рокох,  зявели ше нови мена як цо Мариєта Буила, Ана Римар, Сенка Иван, Себастиян Няради, Александра Живкович, Танита Ходак, Далибор Болдиш, Йована Ноґавица и Саня Чапко, Ясна Мєдєши, Тадей Малацко, Себастиян Надь. Крстина Малацко, Борис Ройко, Андрей Орос, Янко Хома, Марина Сакач, Ясна Медєши, Александра Русковски, Тамара Салаґ, Лидия Костелник, Соня Виславски, Михал Рамач, Деян Павлович, Кристина Афич, Соня Гудак, Ивана Чордаш, Кристина Гайдук, Емилия Чизмар, Кристина Малацко, Александра Дудаш, Мелания и Єлена Мали и велї други…

Мая Зазуляк Гарди зоз сотруднїками

КОНТАКТ МЕДЗИ МЛАДИМА  БУЛ И ВШЕ БУДЗЕ ВАЖНИ

Ище на самим початку, пред 50 роками, а так и нєшка, МАК бул тот хтори порушовал младеж, правда, кус иншак тераз як пред пол вика, кед ше зна же нєшка редакторка и єй екипа орґанизую промоциї, културни и уметнїцки збуваня под МАК-овим меном, же на таки способ мотивую младих на творчу и креативну роботу, а окреме на друженя.

То важне. Бо гоч виходзи у часох диґитализациї кед вельо лєгчейше дойсц до сотруднїкох и собешеднїкох нє лєм по наших местох, алє и на цалей жемовей кулї, контакт медзи младима, стретнуца наживо, єдна з важнєйших улогох, мож шлєбодно повесц и мисия того часопису.

Мая Зазуляк Гарди донєдавна була одвичательна редакторка МАК-у, а  єден кратши период ушорйовали го и Марина Джуджар, а потим и Рената Джуджар, нєшка Вуясинович. Остатнє двочисло (юний-юлий 2022.) Зазуляк Гардийова ушорела и прешла на роботу редакторки дзецинского часопису „Заградка”. Пременєни и ґрафични дизайн, та ше од того, 2022. року за дизайн и компютерски обробок место Емейдия стара Аня Гудак Заґоричник.

Од авґуста мешаца  2022. року, одвичательна редакторка МАК-у постава Андреа Медєши.

МАК МАКОВЦОМ

Од 2020. року додзелює ше награду Мултимедиялного часописа за младих МАК, хтору теди достал длугорочни ґрафични дизайнер Златко Емейди, а того, 2022. року, достала ю длугорочна сотруднїца Цецилия Надь за активносц у часопису, док Иґорови Орсаґови припадла медзиредакцийска награда за активносц и иновативносц у часопису МАК и едициї сликовнїцох Часописа за дзеци „Заградка”.

У року ювилея, МАК видал два кнїжки младих авторох – Емилиї Чизмар „Мили МАК-у: Best off” и зборнїк поезиї и фотоґрафийох „Ґенерация 3@”, а обявел и документарни филм „МАК-ово 50 роки”, авторки Маї Зазуляк Гарди.

(Предлужи ше)

ПОВЯЗАНИ ТЕКСТИ