БУДАПЕШТ – Прешлей соботи, 2. мая, у Будапешту у Мадярскей отримана схадзка Шветовей ради Руснацох/Русинох/Лемкох (ШР РРЛ), на хторей утвердзена програма роботи Тринастого Шветового конґресу (ШК) РРЛ, як и Седмого Шветового Форуму русинскей младежи, хтори 19. и 20. юния буду отримани у Деви, у Румуниї. На схадзки у Будапешту присуствовали дзевец з дзешец членох ШР, а предшедовал предсидатель Ради Дюра Папуґа.
Догварене же з каждей членїци Конґресу буду присуствовац по 10 делеґати, як и по 5 делеґати на Форуму младежи, а пре огранїченосц средствох домашнїх, на тим Конґресу членїци нє буду мац и госцох, як то було на скорейших, лєм делеґатох. Догварене же, по узвичаєней пракси за конґреси, дзешец госцох з цалого швета повола предсидатель ШР.
На пленарних зашеданьох наступного Конґресу, медзи иншим, буду розпатрани и предкладаня дзепоєдних русинских орґанизацийох з Ческей Републики, Сиверней Америки и з Русиї о їх уключованю до ШК, а плановане и отверанє питаня о гералдицки прилаплївим гербу Шветового конґресу РРЛ. Як и на скорейших, и на Тринастим Конґресу делеґати буду робиц и у комисийох – за просвиту, културу, информованє и видавательну дїялносц, за историю Русинох, за Стату ШК, та за медзисобне сотруднїцтво членских орґанизацийох ШК РРЛ и туристични розвой.
На концу Тринастого конґресу будзе вибране и нове зволанє Шветовей ради РРЛ, а
пред початком Конґресу будзе отримана шветочна културно-уметнїцка програма пошвецена 15-рочнїци роботи Културного здруженя Русинох Румуниї, домашнього зашеданя, дзе плановани и привитни слова представительох державних орґанох Румуниї.
На тей шветочносци будзе уручена и Награда ШР РРЛ „Василь Турок Гетеш”, а тогорочни добитнїк етноґраф, фолклориста и музиколоґ Иван Чижмар зоз Свиднїку, зоз Словацкей.
Одлуку о добитнїкови Награди принєсла Комисия за културу ШК, хтора под предшеданьом Миломира Шайтоша з Нового Саду тиж 2. мая зашедала у Будапешту.
На тей схадзки Шветовей ради урядово винєшена и кандидатура Дружтва Руснацох „Руснак” з Петровцох, з Горватскей, за домашнього 14. Конґресу 2017. року.
