Вишли „Дзвони” пошвецени Пасхи

автор маф
850 Опатрене

РУСКИ КЕРЕСТУР – Пасхалне 3. тогорочне число Християнского часопису „Дзвони” вишло прешлей нєдзелї у парохиї св. оца Миколая, та є з найвекшей часци пошвецене актуалному швету – Велькей ноци.

„Дзвони” приноша Вельконоцну винчованку нашого владики Георгия на руским и українским язику, а о Пасхи и напис зоз кнїжки „Дар розума” о. Романа Миза, як и тексти других авторох о смислу церпеня, посту и воскресеня.

У Рубрики „Стереотипи” напис о Водици хтора наш Емаус, а у Сримских дожицох — „Кеди сце ше остатнїраз споведали?”, док у Шантовкох „Интензивни курс любови”, а у „Здогадованьох” означена рочнїца шмерцо о. Йоакима Холошняї и звит з округлого стола о живоце и дїлу о. Романа Миза.

„Дзвони” приноша Актуалносци зоз Вселенскей церкви и звити зоз других стретнуцох и подїйох, медзи нїма и зоз вистави иконох о. Михайла Гардия у Заґребе.

У додатку „Богословска думка” нове предлуженє о паповим писме фамелийом и преглїбйованє Пречистей Дїви Мариї, на тот завод у визиї и искустве Кяри Лубик, сновательки духовносци Руху фоколарох.

Пре чежку финансийну ситуацию у яких ше часопис находзи, главни редактор „Дзвонох” о. Михайло Малацко модлї предплатнїкох у иножемстве хтори нє вимирели предплату, як и потенциялних донаторох же би помогли и оможлївели дальше видаванє того часопису хтори крочел до свойого 26-го року виходзеня.

ПОВЯЗАНИ ТЕКСТИ