РУСКИ КЕРЕСТУР – У рускокерестурскей парохиї св. оца Миколая вишло друге тогорочне число Християнского часопису „Дзвони” и з векшей часци є пошвецене актуалному Вельконоцному посту.
У рубрики „Духовне заренко” толкованя посту у нашей Церкви цо ше дотика єдзеня и музики, а у „Стереотипох” тиж бешеда о смислу посту и текст зоз архиви о тим як Исус зоз свою жертву одбера грихи швета. Ту и текст о Служби Божей преждеосвящених дарох.
По українски толкованя Писма папи Франциска хторе написал за тогорочни Вельки пост, а по руски папово слова о „Фалшивих спасительох котри пробую заменїц Исуса”.
Нови „Дзвони” у рубрики „Сримски дожица” приноша текст з насловом „Исус и нєшка ма бриґи зоз фарисеями”, рубрика „Слово живота” толкованє виреченя „Укаж нам Господи дзе твойо драги” и шведоченя зоз живота.
Цикава и рубрика за младих дзе шведоченя штверих Керестурцох хтори єден рок препровадзую у духовней школи у Марийових варощикох у Италиї и Швайцарскей, а ту и нове предлуженє „Шантовкох” о моци вири и преглїбйованя з пирка Сонї Виславски. Медзи прекладами и писня Битлсох „Най будзе”.
Нови предлуженя у Додатку „Богословска думка” о паповим писму фамелийом и спатраня Мариї, а у „Дзвонох” и звити и фотоґрафиї з числених подїйох у наших парохийох.