РУСКИ КЕРЕСТУР – У парохиї св. оца Миколая за Крачун вишло децемберске число Християнского часопису „Дзвони” хторе 300. число, понеже перше вишло за Крачун 1993. року.
Праве на тот факт здогадує Редакция у рубрики „Духовне заренко”, а ту и Крачунска винчованка нашого владики Георгия на руским и українским язику, як и вистка о преглашеню епархиї св. оца Миколая у Руским Керестуре.
У нових „Дзвонох” ище даскельо крачунски теми, як о актуалних подїйох и духовним значеню, так и о преславйованю того швета у прешлосци.
„Дзвони” провадза и актуални подїї у живоце Церквох, наших парохийох, а у додатку „Богословска думка” нови предлуженя з папового апостолского писма о фамелиї, и преглїбенє теми о Мариї Богородици.
Редакция з тей нагоди дзекує и шицким читачом, предплатнїком и донатором за потримовку и наздаваньом же „Дзвони” годни и далєй виходзиц.