Найвецей вилєтнїкох у лєшику

автор мар, фото мзг
867 Опатрене

РУСКИ КЕРЕСТУР − Швето роботи и роботнїцких правох Керестурци мали нагоду препровадзиц на популарних трох вилєтних местох − на базену, коло озерка на Беґельскей улїци и у лєшику. Найвецей вилєтнїкох було праве у лєшику у чишлє яке нє запаметане роками, а велї млади камповали даскельо днї скорей на скритих и напредок порихтаних местох коло беґелю.

Керестурци рижних ґенерацийох одлучели на вилєту печиц месо на роштилю и рожню, а варело ше и котлїки. Исти пах могло осетиц и през цали валал, понеже було и тих котри шветковали дома.

Першомайски швета и кратки пейцдньови розпуст були права нагода за розвагу школярох, котри отворели и тогорочну сезону купаня на рускокерестурским базену ище пияток, а то за дзепоєдних бул и перши дзень кампованя.

Як дознава Рутенпрес, ЯКП „Руском” и того року пред шветом покошел траву на шицких вилєтних местох у валалє и опирскал процив клїщу, а були порихтани и мехи за шмеце.

ПОВЯЗАНИ ТЕКСТИ