РУСКИ КЕРЕСТУР – На уходох до Руского Керестура з Крущичу и Кули поставени нови двоязични табли з назву места, як и обвисценє о преставаню населєного места, а у центре Керестура поставени нови табли з драгоказами.
Табла з назву места на уходзе з Крущичу тераз знова поставена, понеже є украднута прешлого року, а на уходзе з Кули поставена нова, бо дотерашня уж була дотривала, дознава Рутенпрес од секретара Месней заєднїци Михайла Сабадоша.
Зоз штирох бокох на приходу ґу крижней драги у центре Керестура поставени и нови драгокази, хтори вожачох упутюю до Кули, Оджаку и Крущичу.
Нови табли поставело ресорне оддзелєнє Општини Кула, а средства за табли обезпечени з буджету Општини и з Покраїнского секретарияту за образованє, предписаня, управу и национални меншини-национални заєднїци.