После ювилея и нови компакт-диск

автор сас
1.3k Опатрене

Хор „Розанов” основани при грекокатолїцкей церкви Рождества Пресвятей Богородици у Дюрдьове тих дньох видал нови компакт-диск, други по шоре. У грубо урамикованим компакт-диску находза ше осемнац Богослужебни писньошпиви и кнїжочка зоз илустрациями.

Дюрдьовски Хор на своїм репертоаре ма вельо композициї, бо їх робота у континуитету тирва уж двацец роки, а ювилей з тей нагоди преславени у новембру прешлого року. Же би интерпретациї Богослужебних писньошпивох у їх виводзеню, зоз котрима ше представели у велїх местох нашей держави, алє и у иножемстве, були зачувани голєм з часци, остарали ше його руководителє. У кнїжочки ше находзи биоґрафия Хора „Розанов”, податки о каждим писньошпиву и єй композиторови, биоґрафия хороводительки Татияни Барна и солисти Хора дюрдьовского пароха протоєрея ставрофора о. Йоакима Холошняя. На компакт-диску дати приказ розвою церковней музики од найвчаснєйших часох кед ше полифония зявела медзи восточно-славянскима народами у першим шоре у Русиї.

– Полифония ше розвила на заходзе, на востоку и у Русиї ше шпивало єдногласно, та прейґ уплїву заходу и заходней церкви углавним прейґ України и Билорусиї приходзели таки тенденциї же би ше у Русиї запровадзело вецейгласне шпиванє. Та ше и на компакт-диску находза шпиванки од седемнастого вику по нєшкайши часи з рижних периодох, напрямох, жанрох и композиторох преважно з Русиї – гварел о. Михаил Холошняй, член Хора од самого снованя.

Вон у уводним слову кнїжочки написал факт прецо перши у рядошлїдзе писньошпивох у интерпретациї  Хор „Розанов” праве „Отче наш” Аркадия Г. Дубенского. Прето же з його виводзеньом Хор здобул свою окремносц и препознатлївосц. Ридко кеди їх наступ нє започати з тим писньошпивом и интоновньом соло шпиваня Словох Господнїх зоз найкрашим, найсовершеншим и чловекови богомдaним инструментом – гласом дюрдьовского пароха протоєрея ставрофора о. Йоакима Холошняя. На компакт-диску солисти и Валентина Салаґ, Марко Радишич, Андрей Барна, Уна Молнар и Лидия Кухар. Компакт-диск будзе уписани и доступни у каталоґу Матици сербскей у Новим Садзе, а його промоцию ше планує, алє затераз ище вше нє познати деталї. Дизайнер и тексти у кнїжочки написал о. Михаил Холошняй, на сербски язик их преложела панїматка Наташа Холошняй.

Видруковане 500 прикладнїки компакт-диску, купиц го мож у дюрдьовскей парохиї и капеланиї за 500 динари. Финансовала го Управа за сотруднїцтво зоз церквами и вирскима заєднїцами при Министерству правди Републики Сербиї и Општина Жабель.

DSCN3737

ПОВЯЗАНИ ТЕКСТИ