КУЛА – На вчерайшей, релативно краткей схадзки Скупштини општини (СО) Кула, зволаней по наглим поступку, одборнїки прилапели Одлуку о оцудзеню будовательней жеми з явней власносци Општини Кула, хтору у Индустрийней зони у Кули на лицитованю купело Дружтво за продукцию, услуги и предаванє на велько текстилного материялу и продуктох „Фиорано” зоз Зомбора и на двох гектарох збудує фабрику.
Як потолковане, у напряме вибудови залївней системи арабского инвеститора у хотаре Сивцу, прилапена одлука о пренаменьованю дзєпоєдних парцелох до дильовох, и наспак, так же у сивецким хотаре будзе виробена нова мрежа дильовох, а на схадзки принєшена и Одлука о защити польопривредней жеми, шацох, засадох, дильовох и беґельох од чкодох у кулскей општини.
У рамикох спомнутей одлуки предвидзене и орґанизоване Польочуварскей служби, цо Општина звери окончовательови тих услугох, преґ явней набавки.
Пре виходзенє мандату дотерашнєй директорки Центру за социялну роботу Општини Кула дипл. правнїци Ґордани Вакула з Кули, на вчерайшей схадзки СО за о.д. директора тей установи меновани дипл. педаґоґ з Кули Иван Лещешен.
СО принєсла и Ришенє о даваню согласносци же би предсидатель Општини Кула з Акционерским дружтвом за управянє з явну гайзибанску инфраструктуру „Инфраструктура желєзнїцох Сербиї”, подписал контракт о финансованю отримованя гайзибанскей драги Зомбор-Вербас, за часц хтора преходзи през кулску општину.
Прешлого року ше функционере локалних самоуправох у Кули, Зомборе и Вербаше зоз „Желєзнїцами Сербиї” догварели же би ше тоту драгу нє загашело, так же буду участвовац у єй отримованю. Оценєте же за шицки три самоуправи то рочно коло 10,5 милиони динари, дзе найвекша часц, скоро по поли, будзе за Город Зомбор и Општину Кула, понєже Вербас ма барз малу часц тей драги.
На вчерайшей схадзки поведзене же Општина Кула за отримованє локалней гайзибанскей драги рочно будзе видвойовац коло 6,5 милиони динари, дзе и 2 милиони хтори и дотераз плацела за отримованє преходох прейґ гайзибанских драгох на своєй териториї.
