НОВИ САД – На конкурс за додзельованє безповратних средствох за купованє хижох на валалє могло ше приявиц по 15. януар и за два мешаци, кельо тирвал конкурс, до Заводу за ровноправносц полох сцигла 351 приява заинтересованих парох. Конєчна одлука о додзельованю пенєжу будзе принєшена концом априла, або початком мая, потвердзела за РТВ Катарина Крайнович зоз служби за одношеня з явносцу спомнутого Заводу.
За безповратни средства хтори буду додзелєни за купованє хижох на валалє обезпечени 40 милиони динари, а єдна пара може достац максимално милион динари. На конкурс найвецей прияви сцигли з Остоїчева, Обровцу, Банатского Карловцу, Арадцу, Панчева, Войки, Шиду, Мартинцох, Станишичу и Светозар Милетичу.
Покраїнска влада з ребалансом буджету обезпечела пенєж за нови конкурс, хтори вироятно будзе розписани штредком рока, а условия за конкурованє годни буц и флексибилнєйши, наявела Крайновичова.
Як то уж на вецей заводи надпоминане, циль конкурсу оживйованє войводянских валалох прейґ прицагованя младих парох, алє и економске змоцньованє женох, котри би з партнером були ровноправни власнїки маєтку.