ПИШКУРЕВЦИ (ГОРВАТСКА) – У Пишкуревцох, вчера, 26. октобра, у церкви св. Димитрия преславене храмове швето – Кирбай. Шветочну Службу Божу предводзел парох зоз Сибиню о. Иван Барщевски, а сослужовали парох з Осиєку о. Любомир Стурко, парох у Славонским Броду о. Александар Хмиль, римокатолїцки священїк о. Миро Томас з Леваньскей Вароши и домашнї парох о. Иґор Сикора.
Апостол шпивал дзияк Михал Панкович, Євангелию о. Александар Хмиль, а наказовал о. Миро Томас.
На Служби у значним чишлє були и вирни римокатолїки. а часц римокатолїцкого хору з Пишкуревцох, под руководирельством дзияка Панковича, одшпивала „Оче наш” на церковнославянским язику.
Цала служба Божа була троязична, а по Служби було друженє пред церкву, за хторе домашнї жени за шицких присутних пририхтали и колачи.
