Мено и презвиско: Златко Балинт
Зоз чим ше точно занїмаш?
Огньогасци нє лєм гаша огень. Вони ту у шицких нєвольох:
- Ратую животинї
- Помагаю кед вилїви
- Помагаю кед жемотрешеня
- Помагаю у глєданю особох кед ше страца у лєсох
- Отвераю заглобени дзвери
- Помагаю людзом хтори останю заглобени у превозкох кед ше збию
- Помагаю же би ше зопарло чуренє кед чуря даяки опасни материї
Яку школу треба закончиц же би дахто могол робиц як огньогашец?
Же биш постал огньогашец, перше мушиш закончиц штредню школу. Найлєпше кед то даяка технїчка школа, лєбо електро напрям, лєбо транспортна школа. Потим шлїдзи обука хтора тирва штири мешаци, дзе ше учи предмети наменєни праве огньогасцом, а вец ше кажди дзень повторює предмети зоз школи же би ше их нє забуло и робя ше тести.
Яки ше там предмети учи?
Школа за огньогасцох нє як звичайна школа дзе лєм шедзиш и пишеш. Там ше учи як победзиц огень, алє и як розумиц природу, хемию и машини. Предмети подзелєни на тоти хтори учиш зоз кнїжки и тоти хтори вежбаш на терену. Нє учиш лєм же огень пече, алє и хтори ствари швидко горя, а хтори нє. Прецо ше даєдни огнї гаши з воду, а даєдни нє шме анї случайно. Учи ше о пени, праху и окремних ґазох хтори гартуша огень. Як поставиц камиони, одкаль рушиц гашиц и як окружиц огень же би нє сцекнул на други будинок лєбо древо. Понеже огньогасци часто перши сцигню ґу покалїченим, вони уча скоро исте як и дохторе швидкей помоци. Тиж, уча математику на забавни способ же би швидко могли вираховац яки прицисок води у черевох, лєбо кельо им воздуху остало у фляши. То математика хтора ратує животи!
Дзе огньогасци робя?
У огньогасней станїци (їх други дом). То база и ту огньогасци пребуваю док чекаю же би дахто наволал. Станїца ма вельку ґаражу, спальню и кухню. Постоя и добродзечни огньогасци хтори дома чекаю поволанку же би пошли помогнуц, а тиж так єст и индустрийних огньогасцох, хтори дежураю у фирмох у хторих звекшана опасносц од огня.
Цо шицко треба знац кед сцеш буц добри огньогашец?
Мушиш знац як ше гаши огень, як помогнуц людзом у транспортних нєщесцох, вилївох, а у даєдних ситуацийох потребне и знанє зоз хемиї и математики.
Цо найкрасше у тей роботи?
Гоч робота огньогасца барз опасна и чежка, вона приноши даєдни з найкрасших чувствох хтори чловек може дожиц. Опитай ше гоч хторому огньогасцови, та ци пове же би ше, и попри вистатосци, нє менял нї зоз ким на тим швеце. Найрасши хвильки тоти кед дакому помогнєш, як и приятельство (братство), дзецински ошмихи и маханя, адреналин и акция, побида над стихию.
А цо найчежше?
Гоч робота огньогасца звучи як робота супергероя, вона ма и свой барз чежки бок. Бориш ше зоз „нєвидлївим” нєприятельом, а чежко и кед нє можеш шицким помогнуц. Видзиш чежки сцени, робиш док други шпя, лєбо славя, блїзки особи ше стараю кед ши на роботи.
Яка особа треба же би була кед сце буц добри огньогашец?
Муши буц шмела и физично порихтана, цо значи же може бежац по ґарадичох, лєбо ношиц особу хтора нє може сама висц зоз огня.
Чи ши ше дакеди злєкнул на роботи?
Гей, вшелїяк. Робота така же єст рижни ситуациї у хторих ше злєкнєш за свой, лєбо дачий живот. Може присц и до експлозиї, лєбо трованя од даяких хемикалийох хтори ше находза у огню.
Муши ше ношиц даяки окремни шмати и опрему на роботу?
О, гей! Огньогашец нє може пойсц на роботу у фармеркох и маїци. Його опрема у ствари його „супер-шмати” хтори го чуваю же би ше нє опекол и же би могол дихац там дзе єст диму. Пред тим як руши до акциї, муши облєчиц интервенцийни шмати (якну и панталони) направени од окремних материялох хтори ше нє розпущую и нє горя, муши мац огньогасни шлем, чижми и рукавици, апарат за диханє, окремни додатки як, наприклад, алати на ременю дзе часто ноши шекеру, радио-станїцу, лампу, термовизийну камеру. Кед огньогашец шицко тото облєче и вежнє опрему, вон на себе ма медзи 20 и 30 кили додатней чежини!
Цо биш поручел дзецом хтори сцу постац огньогасци док вирошню?
Кед дахто сце постац огньогашец, перше муши мац жаданє помагац другим, тренирац даяки спорт хтори познєйше помогнє на приємним за огньогасца. Вшелїяк, треба ше и учиц, понеже тото знанє будзе потребне и у пракси.