РУСКИ КЕРЕСТУР – Остатнї дзень 10. Медзинародного волонтерского кампу „Summer in Ruski Krstur” („Лєто у Руским Керестуре”) на роботнї представяня народох у Войводини волонтере чули сербски народни жридлово шпиванки, хтори им виведли Саня Чапко и Йована Ноґавица, членїци Дзивоцкей шпивацкей ґрупи и Виводзацкей танєчней секциї Дому Култури Руски Керестур, так же их научели и крочаї познатого Ужицкого кола. З тоту презентацию закончени змисти тогорочного Кампу, хтори тирвал од 4. юлия.
На Волонтерским кампу участвовали пецеро млади з Турскей, Нємецкей, Французкей, Горватскей (двоме Руснаци) и коло 20 волонтере з Керестура.
За два тижнї волонтере мали динамични змисти и рижнородни роботи на розличних локацийох у валалє – у керестурским оддзелєню „Цицибан” ПУ „Бамби” фарбели и рисовали по мурох, у чим им помогли и дзеци. У роботним тижню волонтере офарбели и часц оградина теметове, ручки, драбинки и ограду на базену и слупи на Хресней драги у Водици.
У другим тижню Кампу волонтере видзели и пробовали облєчива пейцох народох хтори жию у Войводин – Руснацох, Мадярох, Словацох, Українцох и Сербох. Кажди дзень у рамикох роботньох мали задаток направиц и традицийни єдла тих народох, а тоти роботнї обдумала и орґанизовала Любица Няради.
Иножемним волонтером було наисце интересантне видзиц народне облєчиво, та го и дзечнє пробовали и участвовали у правеню националних єдлох шицких представяних народох.
Волонтерски камп орґанизовало Туристичне здруженє „Руски Керестур”, чия предсидателька Ивана Дудаш на законченю оценєла же бул успишни, а у сотруднїцтве з Волонтерским центром Войводини и з финансийну потримовку Роботного цела за младеж Националного совиту Руснацох и Општини Кула.
Камп и того року мал вельку потримовку од Каритасу (дзе ше волонтере костирали и отримовани роботнї), Парохиї (дзе були змесцени), Месней заєднїци Руски Керестур и ЯКП „Руском”.
Лидерка кампу Дорис Бучко похвалєла и Керестурцох, понеже и того року велї людзе приношели желєняву, овоц, спонзоровали з єдлами з цеста, а давали и пенєж за костиранє и так помогли у витворйованю Кампу.
